Nepaldaǵy joıqyn sý tasqynynan qaza tapqandar sany 1118-ge jetip, taǵy 3900-den astam adam habar-osharsyz ketti. Bul týraly infohub.kz saıty habarlaıdy.
Sársenbide bılik ókilderi buryn habar-osharsyz ketken keıbir týrıserdiń baılanysqa shyqqanyn rastady. Nepal Syrtqy ister mınıstrliginiń málimetinshe, ázirge 324 sheteldik azamat qutqarylǵan, al 39 elden shamamen 590 adam áli de izdestirilýde.
Avstralıa premer-mınıstri Entonı Albaneze Palau aralynda ótip jatqan aımaqtyq samıtte jýrnalıserge bergen málimdemesinde, tasqynnan zardap shekken avstralıalyqtardyń sany 43-ten 38-ge azaıǵanyn, tún ishinde taǵy bes adamnyń aman ekeni rastalǵanyn aıtty. Ol «osy qaıǵyly oqıǵanyń ortasynda jaqsy jańalyqtar da bar» dep atap ótti.
Nepal týrızm keńesiniń ókili Sýnıl Sharmanyń aıtýynsha, sońǵy kúnderi buryn habar-osharsyz ketken keminde bes sheteldik týrıs elektrondyq poshta nemese telefon arqyly bılikke habarlasqan.
Qytaı tarapynda qutqarýshylar Nepal shekarasyndaǵy Gırong portyndaǵy apat ornyna jetý úshin ýaqytsha jol salyp bitirdi. Bul týraly CCTV telearnasy habarlady. Sý tasqynymen shaıylyp ketken shekaralyq keshende aýyr tehnıkany paıdalaný úshin jol tazartý jumystary júrgizilýde. Apatqa deıin portqa aparatyn jol sý, laı jáne tastar astynda qalǵan edi.
Qytaıda jeke derekter boıynsha jeksenbige deıin 16 adam qaza taýyp, 546 adam habar-osharsyz ketken.
Apat 26 tamyzda Gımalaıda bastaldy: muzdyqtyń opyrylýy saldarynan tómengi ańǵarlarǵa tas, muz jáne erigen sý aǵyny túsip, qýatty sý tasqynyn týdyrdy. Bul aǵyn Tıbet pen Nepal arqyly ótetin ózenderge jetip, olardyń deńgeıi kúrt kóterildi. Sý tasqyny úılerdi, ǵımarattardy, joldar men kópirlerdi shaıyp, laı men tastardy ilestirip áketti.
Tasqynnan aman qalǵandardyń bir bóligi Nepal astanasy Katmandýǵa bas saýǵalap kelýde. Negizinen Katmandýdan 110 shaqyrym batysta ornalasqan Tımýre qalasynan kelgen 400-ge jýyq adam Yellow Gumba monastyrynda panalap jatyr. Olar qaıtys bolǵan týystary men joǵaltqan úılerine qaıǵyryp, bir-birine qoldaý kórsetýde. Baspanany jergilikti turǵyndar men týystar uıymdastyryp, kómek jeke adamdar men qaıyrymdylyq uıymdarynan kelýde.
Monastyrdaǵylardyń arasynda 21 jastaǵy Rıa Tamang ta bar. Ol 10 aılyq sábıimen sý tasqyny jaqyndaǵanda úıden qashyp shyqqan. «Men úıden sońǵy bolyp shyqtym. Qashý óte qıyn boldy», — deıdi ol. Rıanyń ata-anasy apatta qaıtys bolǵan. Shekaranyń qytaı jaǵyndaǵy Gırong qalasynda aspaz bolyp jumys isteıtin kúıeýi de aman qalǵan. Qazir olar beıneqońyraý arqyly baılanysyp turady.