Nepaldaǵy joıqyn sý tasqyny 1 287 adamnyń ómirin qıdy, dep habarlaıdy infohub.kz saıty The Kathmandu Post-ke silteme jasap.
Tótenshe jaǵdaılardy basqarý ulttyq organynyń dereginshe, qaza tapqandardyń deneleri men súıekteri eldiń segiz aýdanynan tabylǵan. Qazirgi ýaqytta 96 adamnyń jeke basy anyqtalyp, deneleri týystaryna tapsyrylǵan. Jaraqat alǵan 5,3 myńnan astam adamǵa medısınalyq kómek kórsetilgen.
İzdestirilip jatqandardyń resmı tizimine shamamen 5 083 adam engizilgen. Bılik bul kórsetkishke anyqtalmaǵan deneler de kirgenin, sondyqtan ol shynymen tabylmaǵan adamdardyń naqty sanyn kórsetpeıtinin atap ótti. Sonymen qatar, tizimde 583 shetel azamaty bar.
Qutqarýshylar 13 013 adamdy qaýipsiz aımaqtarǵa evakýasıalady. Operasıaǵa Nepal armıasy, polısıasy jáne qarýly kúshteri jumyldyrylǵan. Barlyǵy qutqarý jáne qalpyna keltirý jumystaryna 21 myńnan astam quqyq qorǵaý qyzmetkeri tartyldy.
Tabıǵı apat eldiń ınfraqurylymyna eleýli zıan keltirdi. Aldyn ala baǵalaý boıynsha, 7 570 jeke turǵyn úı qırap, 48 memlekettik ǵımarat, 18 mektep jáne jeti medısınalyq mekeme zaqymdanǵan nemese joıylǵan. Shamamen 55 shaqyrym jol, 33 avtomobıl jáne 68 aspaly kópir tolyǵymen qıraǵan.
Qutqarýshylar zardap shekken aýdandarǵa qurlyq jáne áýe joldary arqyly gýmanıtarlyq kómek jetkizýdi jalǵastyrýda. Baılanys birtindep qalpyna kelýde: Nepal Telecom-tyń zaqymdanǵan 120 munarasynyń 116-sy jumys istep tur, Ncell-diń 78 munarasynyń 75-i qalpyna keltirildi. Bılik zardap shekken aýdandarǵa qutqarý jáne qalpyna keltirý jumystaryn júrgizý úshin jedel qarjy bóldi.
Apat 26 tamyzda Gımalaıdaǵy muzdyqtyń opyrylýynan bastaldy. Tas, muz, laı jáne qoqystyń alyp aǵyny taý ózenderiniń júıesimen ótti. Bıliktiń baǵalaýynsha, Nepalǵa sý tasqynynan keıingi qalpyna keltirýge 5 mıllıard dollarǵa deıin qarajat qajet.
Buǵan deıin Nepal men Qytaı shekarasyndaǵy apat aımaǵynda Qazaqstannyń úsh azamatshasy izdestirilip jatqany habarlanǵan.