Nepal men Tıbette sý tasqynynan zardap shekken aýdandarda qutqarý jumystary ýaqytsha toqtatylǵannan keıin qaıta jandandy. Buǵan deıin taýda paıda bolǵan kóldiń jarylý qaýpine baılanysty izdeý-qutqarý operasıalary toqtatylǵan edi. Tasqyn saldarynan qaza tapqandar sany 552-ge jetti, taǵy myńǵa jýyq adam habar-osharsyz ketken, dep habarlaıdy infohub.kz.
Nepalda 547 adam, Tıbette bes adam qaza tapty. Muzdyqtyń qozǵalýynan sý, laı, tas jáne muz aǵyny paıda bolyp, tabıǵı apatqa ulasqan.
Apattan keıin paıda bolǵan kólde sý deńgeıi kóterile berdi. Beısenbige qaraǵan túni onyń kólemi 2,5 mln tekshe metrden asty. Jańa tasqyn qaýpine baılanysty qutqarý jumystary shamamen úsh saǵatqa toqtatyldy, alaıda keıin táýekel baqylaýda dep baǵalandy.
90 myńnan astam adam zardap shekti. Tasqyn joldardy, kópirlerdi jáne energetıkalyq nysandardy qıratty. Tıbette 558 adam habar-osharsyz ketken, onyń ishinde 260 sheteldik bar.
Qytaı tóraǵasy Sı Szınpın muzdyq kólder men kóshkinderdi baqylaýdy kúsheıtýdi tapsyrdy. Al Nepal birqatar elderdiń qosymsha izdeý-qutqarý toptaryn jiberý týraly usynystarynan bas tartty.
Reuters derekterine súıensek, Nepalǵa kómek kórsetýdi Úndistan, Qytaı, AQSh, Ulybrıtanıa, Japonıa, Ońtústik Koreıa, Shrı-Lanka jáne Bangladesh usynǵan.
Buǵan deıin «Kýrsıv» SİM Nepal-Qytaı shekarasynda sý tasqynynan keıin habar-osharsyz ketken eki qazaqstandyq áıeldi izdep jatqanyn jazǵan bolatyn. Aldyn ala málimet boıynsha, ekeýi de tabıǵı apat aımaǵynda bolǵan.