Nepaldy taǵy da tabıǵat apaty dúrliktirdi: tórt kún boıy toqtamaǵan nóser jańbyr eldiń túkpir-túkpirinde sý tasqyny men kóshkin týdyrdy. Keminde 21 adam qaza tapty, beseýi iz-túzsiz joǵaldy, taǵy beseýi jaraqat aldy, dep habarlaıdy infohub.kz saıty.
Aýa raıynyń qolaısyzdyǵy 24-27 qyrkúıek aralyǵynda údedi. Onyń saldarynan úsh myńǵa jýyq adam evakýasıalandy, júzdegen turǵyn úı zaqymdanyp nemese qırady.
Nepaldyń ortalyq bóliginen aǵatyn Naraıanı ózeniniń sý deńgeıi qaýipti toǵyz metrden asyp, eldi mekenderdi sý basýyna baılanysty jańa eskertý jarıalandy.
Sonymen qatar, kóshkinder eldiń túrli aımaqtaryn jalǵaıtyn mańyzdy kólik toraby sanalatyn Chıtvanǵa aparatyn birneshe tasjoldy jaýyp tastady. Bılik jańbyrdyń jalǵasýy jańa sý tasqyny men kóshkin qaýpin arttyratyndyqtan, oıpatty aımaqtardyń turǵyndaryn saq bolýǵa shaqyrdy.
Apattar qaýpin azaıtý jáne olardy basqarý jónindegi ulttyq basqarmanyń (NDRRMA) sońǵy derekterine sáıkes, kóshkin saldarynan 14 adam qaza tapqan. Kóshkinge baılanysty oqıǵalarda taǵy bes adam iz-túzsiz joǵalǵan.
Sý tasqynynan tórt adam qurban boldy, taǵy úsheýi toqtaýsyz nóser jańbyrdan qaza tapty.