Izraıl premer-mınıstri Bınámın Netanáhý Túrkıa prezıdenti Rejep Taıyp Erdoǵanǵa qarsy Halyqaralyq qylmystyq sotqa (HQS) talap qoıýǵa ázirlik bastaýdy tapsyrdy. Bul týraly derekkózderge silteme jasaǵan ızraıldik i24News telearnasy habarlap, infohub.kz saıty jarıalady.
Telearna derekkózderiniń málimetinshe, Izraıl úkimetiniń basshysy vedomstvoaralyq topqa jáne Halyqaralyq quqyq departamentiniń jetekshisine túrik kóshbasshysyna qarsy HQS-taǵy is úshin materıaldar jınaýdy bastaýdy tapsyrǵan.
BAQ habarlaǵandaı, Netanáhý mundaı sheshimdi «Erdoǵannyń kýrdterge qatysty áreketteri men HAMAS tobyn qarjylandyrýyna» baılanysty qabyldaǵan.
«Bul ókim Erdoǵannyń Netanáhýǵa qatysty ustaý orderin shyǵarýdy talap etip, Interpolǵa júgingeni týraly málimdemesinen keıin berildi; alaıda bul qadam qatynastardyń shıelenisý tizbegindegi bir býyn ǵana bolyp, talap qoıýǵa ázirlik týraly sheshimge ákeldi», — delingen telearna sújetinde.
i24News bekitkendeı, is aıasynda negizgi nazar Erdoǵannyń Túrkıadaǵy kýrd azshylyǵyna qarsy áreketterine aýdarylady, sonymen qatar túrik úkimetiniń HAMAS-ty qarjylandyrý máseleleri de qozǵalady.
Izraıldiń ózi HQS-ta is bastaýy yqtımal, alaıda talap qoıý úshin úshinshi taraptyń tartylýy yqtımaldyǵy joǵary. Izraıl HQS ıýrısdıksıasyn moıyndamaıdy, óıtkeni Rım statýtyna qol qoımaǵan; Túrkıa da onyń qatysýshysy emes.
Degenmen derekkózder Izraıldiń naqty talap qoıýdan qashýdy kózdep, «isti ázirleý faktisiniń ózin Erdoǵanǵa qysym jasaý jáne tejeý quraly retinde paıdalanýǵa» senim artyp otyrǵanyn atap ótedi.
Netanáhýdyń ózi bul aqparatty túsindirýden bas tartty, Ádilet mınıstrliginiń ókilderi de dál osyndaı ustanymda boldy.