Jańa Zelandıa premer-mınıstri Krıstofer Lakson qarashada ótetin jalpy saılaý aldynda senimsizdik daýysynan sátti ótti. Ol óziniń bıleýshi Ulttyq partıasynyń tolyq qoldaýyna ıe ekenin málimdedi. Bul týraly infohub.kz habarlaıdy.
Lakson sársenbide Ulttyq partıa fraksıasymen «jedel» kezdesý ótkizip, óz kóshbasshylyǵyna qatysty «ósken boljamdardy» talqylady. Úsh saǵattan astam ýaqytqa sozylǵan kezdesýden keıin ol jýrnalıserge: «Men fraksıamyzdyń tolyq qoldaýyna ıemin... Fraksıa birtutas jáne bul saılaýda jeńiske jetýge bel býǵan», — dedi.
Bul onyń kóshbasshylyǵyna tórt aı ishinde ekinshi ret jasalǵan syn boldy. Ekonomıkalyq ósimniń baıaýlyǵy men kóshbasshynyń birqatar qatelikteri saldarynan Lakson men onyń partıasyna qoldaý álsiz bolyp qaldy.
Ótken aptada Lakson eldiń saılaý júıesine qatysty referendým ótkizý múmkindigin tikeleı efırde, partıa áriptesterimen aldyn ala keńespeı aıtyp, synǵa ushyrady. Osy aıdyń basynda 56 jastaǵy saıasatker shaǵyn bıznes ıelerin «eresek bolýǵa» shaqyrǵan sózimen Jańa Zelandıanyń bıznes qaýymdastyǵyn ashýlandyrdy. Ol eldegi bıznes ortalyq úkimetke «ata-ana men bala qarym-qatynasynda» ekenin jáne kómekke tym jıi júginetinin aıtty. Keıin ol keshirim surap, kóptegen adamnyń qıyn kezeńdi bastan ótkerip jatqanyn moıyndady.
Burynǵy Air New Zealand basshysy 2023 jylǵy saılaýda óziniń ortalyq-ońshyl partıasyn jeńiske jetkizip, ómir súrý qunyn tómendetýge jáne salyqtardy azaıtýǵa ýáde bergen edi. Sonda ol: «Meniń sizderge bergen ýádem — bizdiń úkimet árbir jańa zelandıalyq úshin jumys isteıdi», — degen bolatyn. Alaıda sońǵy aılarda ekonomıkanyń toqyraýy jalǵasyp, jumyssyzdyq 11 jyldyq maksımýmǵa — 5,6 paıyzǵa jetkendikten, onyń partıasy saýalnamalarda upaı joǵaltyp keledi.
Sársenbi kúni tańerteń jarıalanǵan 1News Verian saýalnamasy Laksonnyń premer-mınıstr retindegi reıtıńi 17 paıyzǵa túskenin kórsetti — bul onyń bıliktegi kezeńindegi eń tómengi kórsetkish. Degenmen ol saýalnamaǵa engen barlyq basqa kandıdattardan alda tur. Jańa Zelandıada kezekti jalpy saılaý 7 qarashada ótedi.