Nıasın dep te atalatyn B3 vıtamıniniń joǵary dozasy adamnyń ımýndyq júıesin mı isiginiń eń agressıvti túri — glıoblastoma jasýshalaryn joıýǵa qabiletti etedi. Bul týraly klınıkalyq zertteýlerdiń nátıjeleri habarlaıdy, dep jazady infohub.kz saıty.
Emdeýdiń jańa ádisin Kalgarı ýnıversıtetiniń zertteýshileri synaqtan ótkizdi. Klınıkalyq zertteýlerdiń birinshi jáne ekinshi fazalary aıasynda standartty radıo- jáne hımıoterapıaǵa B3 vıtamıniniń — nıasınniń joǵary dozasyn baqylaýmen qabyldaý qosyldy.
Ǵylymı jobany onkolog Glorıa Roldan Ýrgoıtı men Kammıng medısına mektebiniń neırobıology Vı Iong basqardy. Glıoblastoma aǵzanyń qorǵanys júıeleriniń jumysyn bógeıdi, alaıda nıasındi eksperımentaldy qoldaný ımýndyq jasýshalardy «oıatyp», jańartyp, olarǵa isikti shabýyldap, joıý qabiletin qaıtarady. Bastapqyda bul áser tyshqandarǵa júrgizilgen zerthanalyq tájirıbelerde anyqtalǵan.
Synaqqa 24 pasıent qatysty. Qatysýshylardyń 82%-ynda alty aı ishinde aýrýdyń órshýi baıqalmady, bul standartty emdeýdiń tarıhı kórsetkishterinen 28%-ǵa joǵary. Zertteýge qatysýshylardyń biri, 55 jastaǵy Edvard Valdner óziniń jaǵdaıy aıtarlyqtaı jaqsarǵanyn jáne skanerleý nátıjeleri turaqty ekenin atap ótti.
Hochkıs mı ınstıtýty men Arnı Charbonno isik ınstıtýtynyń avtorlary nıasınniń joǵary dozasy ýytty bolýy múmkin ekenin, sondyqtan emdeý qatań medısınalyq baqylaýmen júrgizilýi kerektigin atap kórsetedi. Journal of Neuro-Oncology jýrnalynda jarıalanǵan zertteý nátıjeleri 48 erikti jınalǵannan keıin túpkilikti qorytyndylanady.
Mańyzdy: bul materıal tek tanysý maqsatynda berilgen jáne dárigerlik usynym nemese medısınalyq taǵaıyndaý bolyp sanalmaıdy. Bul derekterdi ózin-ózi dıagnostıkalaý nemese emdeý úshin paıdalanbańyz. Densaýlyqqa qatysty kez kelgen sımptomdar men suraqtar týyndaǵanda, mindetti túrde bilikti dárigermen keńesińiz.