Nıderland ortalyq banki (DNB) AQSh pen Kanadada saqtalǵan 86 tonna altyn qoryn Londonǵa aýdarǵanyn habarlady. Bul sheshim «geosaıası turaqsyzdyqtyń artýyna» baılanysty qabyldanǵan, dep habarlaıdy infohub.kz saıty.
Bank málimetinshe, Londonda saqtalǵan altyndy Nú-Iork pen Ottavadaǵyǵa qaraǵanda ońaı satýǵa bolady. «Bul daǵdarys jaǵdaıynda bankke altyndy tez paıdalanýǵa múmkindik beredi», — delingen sársenbidegi málimdemede.
DNB prezıdenti Olaf Sleıpenniń aıtýynsha, bul qadam altyn qoryn paıdalaný múmkindigin jaqsartty. «Biz altyndy eshqashan paıdalanýǵa týra kelmeıdi dep úmittenemiz, alaıda tózimdilik pen daıyndyqty arttyrý qajet», — dedi ol.
2025 jyldyń sońynda Nıderlandtyń jalpy altyn qory 612,4 tonnany qurap, quny 72,2 mlrd eýroǵa (83,7 mlrd dollar) baǵalanǵan. Aýdarýǵa deıin bank altynynyń 31,3 paıyzy Nú-Iorkte, 19,7 paıyzy Ottavada saqtalǵan edi. Aýdarymnan keıin bul elderdiń árqaısysynda Nıderland altyn qorynyń 18,5 paıyzy qaldy.
Londondaǵy altyn úlesi 18,1 paıyzdan 32,1 paıyzǵa ósti. Bank áli de óz altynynyń 30,8 paıyzyn Nıderlandta saqtaıdy.
Aýdarym ishinara satyp alý-satý arqyly, ishinara fızıkalyq tasymaldaý arqyly júzege asyrylǵan. Bank AQSh pen Kanadadan Zeıstke 27 tonnadan astam fızıkalyq altyn jetkizgen. Sol mólsherdegi altyn Zeıstten Londonǵa aýdarylyp, altyn quımalaryn balqytýdyń qajeti bolmaǵan.
«Satyp alý-satý men fızıkalyq tasymaldaýdy biriktirý arqyly úlken kólemdegi altyndy tasymaldaýǵa baılanysty táýekelderdi bólýge múmkindik týdy», — dep túsindirdi bank. Operasıa bıylǵy jyldyń naýryz-tamyz aılary aralyǵynda júrgizilgen.
Parıjdegi Ulttyq altyn saýdasy uıymynyń prezıdenti Loran Shvarstyń pikirinshe, ortalyq bankter shamamen on jyl boıy rezervterin aýystyryp keledi. «AQSH-taǵy qazirgi saıası jaǵdaı keıbir ortalyq bankterdi basqa saqtaý oryndaryn tańdaýǵa ıtermeleýi múmkin», — dedi ol. Shvars London naryǵy eń tereń jáne ótimdi ekenin, sondyqtan daǵdarys kezinde altyndy paıdalaný ońaı ekenin atap ótti.
Cite Gestion Private Bank analıtıgi Djon Plassard Nıderlandtyń bul qadamy «daǵdarys jaǵdaıynda altynnyń qoljetimdiligin arttyrýǵa» baǵyttalǵanyn aıtty. Ol ázirge bul «bir rettik áreket» dep esepteıdi, biraq basqa ortalyq bankter de osylaı istese, bul AQSH-qa degen senimge nuqsan keltirýi múmkin dep eskertti.
Jyl basynda Germanıada óz ortalyq bankiniń Nú-Iorktegi rezervteriniń qaýipsizdigine qatysty alańdaýshylyq týyndaǵan bolatyn. Alaıda yqpaldy Býndesbank ázirge rezervterin Nú-Iorkten aýystyrmaý týraly sheshim qabyldady. «Nú-Iork federaldy rezervi bizdiń altyndy saqtaıtyn mańyzdy oryn bolyp qala beredi», — dep málimdedi bank qańtar aıynda ARD telearnasyna.