Нидерландтың оңтүстігіндегі «Бексе Берген» сафари-паркінде қабылан қамауында ауыр жарақат алған тәжірибелі күтуші бірнеше күннен кейін қайтыс болды. Бұл туралы саябақ басшылығы растады, деп хабарлайды infohub.kz сайты.
Аталған әйел саябақта 40 жыл еңбек еткен. Сенбі күні ол жабық ғимаратта екі парсы қабыланын күтіп-баптап жүргенде шабуылға ұшырады. Ол басы мен мойнынан жарақат алып, шұғыл операция жасалды, алайда сейсенбі күні саябақ оның қайтыс болғанын хабарлады. Оқиға бойынша тәуелсіз тергеу жүргізілетіні де мәлімделді.
«Бексе Берген» саябағы күтушінің қайтыс болуы туралы мәлімдемесінде оның 17 жасында осында еңбек жолын бастағанын, төрт онжылдық бойы үзіліспен осы жерде жұмыс істегенін атап өтті. «Оның қазасы баршамызды қатты қайғыртты, жүрегіміз оның отбасымен, достарымен және жақындарымен бірге. Қазіргі басты назарымыз — оның отбасы мен әріптестеріне қолдау көрсету», — делінген хабарламада.
Әдетте қызметкерлерден бөлек ұсталатын екі қабылан ауа райы нашарлағандықтан ғимарат ішіне кіргізілген. Қамау ішінде не болғаны әзірге белгісіз, өйткені онда бейнебақылау камералары жоқ. Жергілікті NL Times жаңалықтар сайтының мәліметінше, ауыр жарақатқа қарамастан әйел рация арқылы әріптестерін хабардар ете алған. Кейін ол ауыр халде тікұшақпен ауруханаға жеткізілді.
Саябақ өкілі жергілікті «Омруп Брабант» бұқаралық ақпарат құралына қабыландардың табиғи мінез-құлық танытқанын, оларды ұйықтатып өлтірмейтінін айтты. «Олар — жыртқыш, солай болып қала береді», — деді ол.
«Бексе Берген» қонақтар мен қызметкерлер көңіл айта алатын еске алу орнын жасайтынын хабарлады.