Nıgerıanyń soltústik-batysyndaǵy Zamfara shtatynda qarýly bandalar aýyldarǵa shabýyl jasap, keminde 20 adamnyń ómirin qıdy, dep habarlaıdy infohub.kz saıty.
Talata Mafara aýdanyna qarasty Saýna okrýginiń ókili Nasırý Laýýalıdiń AFP agenttigine aıtýynsha, shabýyl sársenbi kúni jergilikti ýaqyt boıynsha saǵat 15:00 men 16:00 aralyǵynda bolǵan. «Búgin kóptegen qaraqshylar bizdiń qaýymdastyqtarymyzǵa basyp kirip, kezdesken adamdardyń bárin nysanaǵa aldy», — deıdi ol.
Bul shabýyldar Nıgerıanyń soltústik-batysy men ortalyǵyndaǵy zorlyq-zombylyqtyń kúsheıýi aıasynda oryn aldy. Sońǵy aptalarda qarýly bandalar aýyldarǵa shabýyldap, mal urlap, turǵyndardy bopsalaý úshin urlap ketýde.
Seısenbi kúni keshke Kvara shtatynda kúsh qurylymdary keminde úsh kúdikti qaraqshyny joıyp, bıznesmen Týkýr Sannıdi qutqardy. Bul týraly Nıgerıanyń The Punch basylymy habarlady.
Nıgerıada qarýly toptardyń iri kólemdegi aqsha tólemin talap etip adam urlaýy jıilegen. Bul jaǵdaıdy eldiń soltústik-shyǵysyndaǵy «Boko Haram» kóterilisimen shıelenisken qaýipsizdik daǵdarysy ýshyqtyrdy. SBM Intelligence kompanıasynyń málimetinshe, 2024 jyly shabýyldaýshylar tólem retinde 1,6 mıllıon dollardan astam aqsha alǵan.
Osy aıdyń basynda Ońtústik-batys Oıo shtatyndaǵy úsh mektepten urlanǵan ondaǵan oqýshy men muǵalim 56 kúnnen keıin qutqaryldy. Prezıdent Bola Tynýbýdyń málimdemesinde segiz kúdikti ustalyp, belgisiz sany joıylǵany aıtyldy. Qorǵanys mınıstri Krıstofer Mýsanyń aıtýynsha, kúdiktiler kepilge alynǵandardy úkimetke óz komandırlerin túrmeden bosatý úshin qysym kórsetý quraly retinde paıdalanbaq bolǵan.