Nıgerıanyń ońtústiginde metanol qosylǵan jergilikti аlkogóldi ishimdikten 48 adam qaza taýyp, taǵy 100-ge jýyq adam em qabyldap jatyr. Bul týraly beısenbi kúni resmı tulǵalar málimdedi, dep habarlaıdy infohub.kz saıty.
Ondo shtatynyń densaýlyq saqtaý jónindegi komısary Bandjı Adjakanyń aıtýynsha, oqıǵalar Odıgbo jáne Irele jergilikti basqarý aımaqtarynda tirkelgen. Barlyǵy 182 adam zardap shekken, olardyń bir bóligi aýrýhanada emdelýde.
«Men eki rúmka iship, juma kúni syrtqa shyqtym. Senbide kózim kórmeı qalǵanyn baıqadym», — dedi 32 jastaǵy Sola Adebaıo aýrýhana tóseginde jatqan kúıi jergilikti TVC News telearnasyna.
Afrıkanyń halyq sany eń kóp elinde jergilikti óndirilgen аlkogóldi ishý keń taralǵan, ásirese aýyldyq jerlerde ol arzan ári baqylaý nashar.
«Bul jaǵdaı tez damydy. İshimdikti ishken soń, mólsherine qaraı, búırek isten shyǵady, kóz ketedi, mı zaqymdanady», — dedi Adjaka Associated Press agenttigine osy sýsyn týraly aıtyp.
Ondo shtaty polısıasynyń ókili Abaıomı Djımohtyń málimdemesinde oqıǵaǵa qatysy bar 15 adam ustalǵany, onyń ishinde «metanol bolýy múmkin zattardy óndirýge qatysy bar» degen kúdiktiniń qazir polısıa tergeýine kómektesip jatqany habarlandy.
Jergilikti turǵyndar AP agenttigine quramynda аlkogól mólsheri joǵary «Monkey Tail» dep atalatyn tanymal shóptik sýsynǵa metanol qosylǵan bolýy múmkin dep kúdiktenetinin aıtty.
Odıgboda osy sýsyndy satatyn saýdager tutqyndalýdan qorqyp, esimin jasyryp, AP agenttigine Monkey Tail-dyń eki túri bar ekenin aıtty: túpnusqa, qaýipsiz nusqasy jáne qaýipti taǵy bir túri.
Jergilikti buqaralyq aqparat quraldarynyń habarlaýynsha, alǵashqy ólim jaǵdaıy shamamen eki apta buryn tirkelgen.
Nıgerıanyń Azyq-túlik jáne dári-dármekterdi baqylaý jónindegi ulttyq agenttigi qazir paketter men kishkentaı plasık ydystardaǵy аlkogólge el boıynsha tyıym salýdy qoldanyp jatyr. Vedomstvonyń málimdeýinshe, mundaı ydystar balalar men jastarǵa ońaı qoljetimdi.