Nıgerıanyń munaı óndiretin Rıvers shtatynda munaı tıeý kemesinen munaı urlaý áreketi keminde 37 adamnyń ólimine sebep boldy. Qurbandardyń kóbi ýly gazdy jutyp qoıǵan. Bul týraly «Jastar jáne qorshaǵan ortany qorǵaý ortalyǵy» atty qoǵamdyq uıym juma kúni habarlady, dep habarlaıdy infohub.kz saıty.
Uıymnyń málimetinshe, beısenbi kúni qurbandar bir mezgilde «zańsyz qubyrdan» óz qaıyqtaryna shıki munaı quıyp alýǵa tyrysqan. Bul olardyń joǵary qysymdaǵy ýly gazdy jutýyna ákeldi. Eriktiler jelisine silteme jasaǵan esepte kóptegen adam áli de habarsyz ketkeni aıtylady.
Nıgerıa polısıasy juma kúni oqıǵany rastady, biraq qaza tapqandar sanyn atamady jáne tergeý júrip jatqanyn málimdedi. «Rıvers shtatynyń polısıa basqarmasy qaza bolǵandardy rastaıdy. Qurbandar shıki munaıdy urlamaq bolǵan», — dedi Rıvers shtaty polısıasynyń ókili Blessıng Agabe.
Munaı urlyǵy — Afrıkadaǵy eń iri munaı óndirýshi Nıgerıanyń Nıger aımaǵynda jıi kezdesetin qubylys. Ondaǵan jyldar boıy júrgizilgen munaı barlaý jumystary halyqtyń kedeıligi men ekologıalyq degradasıaǵa ákeldi.
Nıgerıa úkimeti munaı urlyǵy jyl saıyn birneshe mıllıard dollar shyǵyn keltiretinin aıtyp, bul áreketke qarsy kúresti kúsheıtip jatyr.