Nırmal Pýrja bastaǵan halyqaralyq álpınıser toby Pakıstandaǵy Broýd-Pıkte bolǵan kóshkinnen keıin habar-osharsyz ketti, dep habarlaıdy infohub.kz.
Brıtan armıasynyń burynǵy teńiz jaıaý áskeri, nepaldyq Nırmal Pýrja jetekshilik etetin on adamnan turatyn top Qaraqoram jotasyndaǵy bıiktigi 8047 metr bolatyn osy shyńdy baǵyndyrý kezinde kóshkinge ushyraǵan. Pakıstan álpınıser qaýymdastyǵynyń málimetinshe, kóshkin beısenbi kúni tús kezinde bolǵan. Sodan beri toppen baılanys ornatylmaǵan.
Álpınıser quramynda bir amerıkalyq, bir qytaılyq, bir omandyq jáne bes nepaldyq bar ekeni habarlandy. Ekspedısıa jetekshisi Pýrja 2019 jyly álemniń 8000 metrden asatyn 14 shyńynyń barlyǵyn alty aıdan sál astam ýaqytta baǵyndyryp, tanymal bolǵan.
Pakıstan alpi klýbynyń vıse-prezıdenti Kárrár Haıdrıdiń Bı-bı-sıge aıtýynsha, qutqarý jumystaryn júrgizý úshin juma kúni tańerteń Pakıstan ýaqyty boıynsha tikushaq jiberý josparlanyp otyr, biraq bul aýa raıy jaǵdaıyna baılanysty.
Broýd-Pık álemdegi eń bıik 12-shi shyń sanalady jáne ekspedısıalar úshin eń qıyn shyńdardyń biri retinde belgili. Pakıstan alpi klýby bólek málimdemede bılikpen únemi baılanysta ekenin jáne barlyq qoljetimdi resýrstardy jumyldyrýǵa kúsh salyp jatqanyn jetkizdi. Klýb álpınıserdiń amandyǵy men sátti qutqarylýy úshin duǵa etip, olardyń otbasylary men halyqaralyq alpi qaýymdastyǵymen birge ekenin bildirdi.
Pýrja 2003 jyly Brıtan armıasyna qosylyp, 2009 jyly teńiz jaıaý áskeri atanǵan. Onyń álpınızmdegi mansaby 2012 jyly Everest bazalyq lagerine jaıaý barǵan kezde bastalyp, jospar boıynsha qaıtýdyń ornyna, ol tutas shyńdy baǵyndyrýdy uıǵarǵan.