Kenıadan shyqqan, Qazaqstan atynan synǵa túsken jeńil atlet Nora Djerýto Japonıada ótip jatqan Azıa oıyndarynda 5000 metrge júgirýde besinshi oryn aldy. Al bir kún buryn ol óziniń basty dıstansıasy – 3000 metrge kedergilerden júgirýde kúmis júlde jeńip alǵan bolatyn, dep habarlaıdy infohub.kz saıty.
Djerýtomen birge 5 shaqyrymdy quramadaǵy qurbysy Deısı Djepkemeı de júgirdi. Ol buǵan deıin 10 000 metrde tórtinshi bolyp márege jetken edi. Qazaqstandyqtar alǵashqy metrlerden-aq alǵa umtylyp, komandalyq taktıka qoldanýǵa tyrysty. Alaıda qarsylastar qýyp jetti. Sodan keıin Deısı sál qalyp qoıdy da, Nora jalǵyz ózi júlde úshin kúresti jalǵastyrdy.
Bizdiń sportshy sońǵy aınalymǵa deıin kósh bastap keldi. Keıin Bahreınnen Ýınfred Iavı men japonıalyq Nozomı Tanaka alǵa ozdy. Olar altyn men kúmisti ózara bólisti.
Máreni basynan bastap bastap kelgen Djerýtoǵa fınıshte kúsh jetpedi. Ol – besinshi, Djepkemeı – jetinshi.
AZIA OIYNDARY-2026
28 qyrkúıek. 5000 metr. Áıelder
🥇 1. Ýınfred IaVI (Bahreın) – 15.10,18
🥈 2. Nozomı TANAKA (Japonıa) – 15.11,65
🥉 3. Parýl CHAÝDHARI (Úndistan) – 15.14,61
…5. Nora DJERÝTO (Qazaqstan) – 15.18,21
…7. Deısı DJEPKEMEI (Qazaqstan) – 15.37,89
2022 jyly osy dıstansıada qola júldeni taǵy bir natýralızasıalanǵan sportshy Karolın Chepkoech Kıpkırýı jeńip alǵan edi.
Jazǵy Azıa oıyndary resmı túrde 19 qyrkúıekte ashylyp, 4 qazanda máresine jetedi. 45 eldiń sportshylary qatysatyn jarystarda 460 medal jıyntyǵy sarapqa salynýda. Azıada-2026-da Qazaqstan quramasynyń quramynda 35 sport túrinen 558 sportshy synǵa túsýde.
Oıyndardyń birinshi kúni qazaqstandyqtar tórt altyn medal jeńip aldy. Oıyndar chempıondary atanǵandar: veloshabandozdar Rınata Sýltanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva. Qurama qorjynyna besinshi altyndy MMA saıyskeri Erkinǵalı Búrkitalın saldy. Altynshysyn – onyń aralas jekpe-jektegi komandalasy Qadyrbek Shynbaev qosty. 23 qyrkúıekte Lýsenko AI-2026-nyń eki dúrkin chempıony atandy. Segizinshi joǵary synaqtaǵy medaldi 24 qyrkúıekte eskekshiler Vladıslav Iakovlev pen Ivan Chernýhın erler arasyndaǵy juptyq esý saıysynda jeńip aldy. Toǵyzynshy altyn medaldi bizdiń shpagashylar komandasy ıelendi.
Iasmına Toqsanbaeva jeńip alǵan marafondyq júristegi altyn Qytaıǵa berildi – qazaqstandyq sportshynyń sporttyq aıaq kıimine qatysty narazylyq qanaǵattandyryldy.
Oıyndardyń segiz kúninen keıin Qazaqstan beıresmı medal esebinde besinshi orynda turdy.