Norvegıanyń ońtústik-shyǵysyndaǵy turǵyn aýdandy sharpyǵan iri órt saldarynan 400-den astam adam evakýasıalandy, dep infohub.kz habarlaıdy.
Órt 100-den astam úıdi joıyp, áli tolyq oqshaýlanbaǵan, degenmen basqa turǵyn úılerge taralý qaýpi aıtarlyqtaı tómendegen.
Órt 18 shilde kúni tústen keıin Drammen qalasynyń Krokstadelva aýdanyndaǵy taýnhaýstardyń birinde bastalǵan. Qatty jeldiń saldarynan alaý kórshi úıler men jaqyn mańdaǵy orman massıvine tez taraǵan.
Ońtústik-shyǵys okrýgi polısıasynyń málimetinshe, órt áli de baqylaýǵa alynbaǵan, alaıda turǵyn úılerge odan ári taralý qaýpi aıtarlyqtaı azaıǵan. Ornynda órt sóndirýshiler jumysyn jalǵastyryp, tútindep jatqan oshaqtardy sóndirýde. Sońǵy táýlikte operasıaǵa on órt-qutqarý qyzmeti men 17 órt sóndirý bóliminen 100-ge jýyq órt sóndirýshi tartyldy. Qazirgi ýaqytta ornynda 12 órt sóndirý esebi qalyp, olarǵa qarýly kúshter, azamattyq qorǵanys bólimsheleri men polısıa kómektesýde.
Norvegıanyń Azamattyq qorǵanys basqarmasy (DSB) órt sóndirýge alty órt tikushaǵyn tartty, taǵy jeteýi eldiń ońtústiginde rezervte tur. Áýeden apat aımaǵyna shamamen 800 myń lıtr sý tógildi.
DSB dırektory Lars Iakob Hıım bolǵan oqıǵany Norvegıanyń qazirgi tarıhyndaǵy osyndaı aýqymdaǵy eń iri órt dep atady. «Baqytymyzǵa oraı, ázirge qaza bolǵandar nemese aýyr jaraqat alǵandar týraly habar joq», — dedi ol. Bılik málimetinshe, habarsyz ketkender de joq. Oqıǵa saldarynan azamattyq qorǵanys qyzmetkerin qosa alǵanda, eki adam tútinmen ýlanyp aýrýhanaǵa jatqyzyldy. Bir órt sóndirýshi jeńil jaraqat alsa, segiz polıseı tútin áserinen zardap shekti.
Órt sóndirý qyzmeti ókilderiniń aıtýynsha, jańa turǵyn úılerge tikeleı qaýip joq, alaıda mańaıda jekelegen orman órtteri áli de jalǵasýda. Senbige qaraǵan túni naızaǵaıdan keıin órt sóndirýshiler ýaqytsha keıbir ýchaskelerdi tastaýǵa májbúr boldy. Bılik kútiletin qatty jańbyr órtti tolyǵymen baqylaýǵa alýǵa kómektesedi dep úmittenedi.