Норвегия қоғамдық орындарда «ақылды көзілдірік» қолдануға тыйым салған әлемдегі алғашқы ел болуы мүмкін. Шектеулер саябақтарға, жағажайларға, мұражайларға, сауда орталықтарына, мектептерге, балабақшаларға, ауруханаларға, спортзалдарға және бұқаралық іс-шараларға қатысты болмақ, деп хабарлайды infohub.kz сайты.
Тиісті заң жобасын Норвегияның Еңбек партиясы парламентке ұсынды. Себебі айтпаса да түсінікті: мұндай көзілдірік адамдарды байқатпай түсіруге, олардың жеке өміріне қол сұғуға немесе өздері білмейтін фото мен видеоны интернетке жариялауға мүмкіндік береді.
«Адамдар бақылауда емес деп санайтын орындар мен жағдайларда оларды жасырын түсіруі мүмкін деп қорқатын қоғамда өмір сүргіміз келмейді», — деді Норвегияның цифрландыру және мемлекеттік басқару министрі Торгейр Микаэльсен.
Еуропада әсіресе Meta шығаратын кіріктірілген камерасы бар көзілдіріктер көптеген сұрақ тудырып отыр. Мысалы, Францияда балалар құқығын қорғау ұйымы жақында адамдардың келісімінсіз түсірілген шамамен 20 оқиға туралы хабарлама алды. Бұл жазбалардың көбі әлеуметтік желілерге тарап, келеке мен қорлауға себеп болды.
Сонымен қатар «ақылды көзілдіріктің» қарапайым өмірге қаншалықты тез енгені таңғалдырады. Жақында ғана қалам, түйме, қуаттағыш және басқа да күнделікті заттардың астына жасырылған камералар ақпаратты жасырын жинау құралы саналып, оларды қолданғаны үшін заң алдында нақты жауапкершілікке тартылуға болатын. Оның ішінде Қазақстанда да. Ал бүгінде дәл сол технология қарапайым көзілдірікке кіріктіріліп, тұтынушылық гаджет ретінде еркін сатылып жатыр.
Бұған дейін Kursiv LifeStyle Rollme компаниясы Sony-дің 12 Мп камерасы, дауыстық жасанды интеллект көмекшісі және әңгімені нақты уақытта аудару функциясы бар ақылды көзілдірік шығарғанын жазған. Оның бағасы — $100.