Norvegıa koroli Harald V qaıtys bolǵannan keıin nebári eki apta ótkende, onyń qaryndasy — hanshaıym Astrıd te ómirden ótti. Ol 94 jasta edi. Qaraly habardy Norvegıa Kоróldik úıiniń baspasóz qyzmeti taratty, dep habarlaıdy infohub.kz saıty.
«Mártebeli kоról hanshaıym Astrıdtiń qaıtys bolǵany týraly habardy tereń qaıǵymen qabyldady. Hanshaıym búgin, 11 qyrkúıek juma kúni 94 jasynda ómirden ótti», — delingen baspasóz qyzmetiniń habarlamasynda.
Hanshaıym Astrıd 1932 jyly 12 aqpanda Osloda dúnıege kelgen. Ol Norvegıanyń bolashaq koroli Ýlaf V men kronprınsessa Martanyń ekinshi qyzy, sondaı-aq bolashaq kоról Harald V-niń qaryndasy bolatyn.
1940 jyly Germanıa Norvegıaǵa basyp kirgennen keıin ol anasy, ápkesi jáne aǵasymen birge elden ketti: aldymen otbasy Shvesıaǵa, sodan keıin AQSH-qa kóship, Ekinshi dúnıejúzilik soǵys aıaqtalǵansha sonda turdy. Otanyna oralǵan soń Astrıd Oksfordta saıası tarıh pen áleýmettik-ekonomıkalyq pánderdi oqydy.
1954 jyly anasy qaıtys bolǵannan keıin 22 jastaǵy Astrıd Norvegıanyń birinshi hanymy atanyp, ákesiniń janynda ókildik mindetter atqardy. Ol bul róldi 1968 jyly aǵasy Harald Soná Haraldsenge úılengenge deıin saqtady. 1961 jyly Astrıd kásipker Iýhan Martın Fernerge turmysqa shyqty. Jubaılardyń bes balasy boldy. Ferner 2015 jyly qaıtys boldy. Hanshaıym sondaı-aq anasy — kronprınsessa Martanyń memorıaldyq qoryn basqardy.
Eske salaıyq, 28 tamyzda 89 jasynda Norvegıa koroli Harald V qaıtys boldy. Ol aýrýhanada tynysh ómirden ótkeni habarlandy. Harald V-niń qaıtys bolǵany týraly habardan keıin taq birden uly Hokonǵa ótkeni belgili boldy.
Prezıdent Qasym-Jomart Toqaev Norvegıa koroli Hokon VIII-ge ákesi kоról Harald V-niń qaıtys bolýyna baılanysty kóńil aıtý jedelhatyn joldady. 9 qyrkúıekte Qazaqstannyń Norvegıadaǵy elshisi Ádil Tursynov Osloda ótken kоról Harald V-niń memlekettik jerleý rásimine qatysty. 10 qyrkúıekte prezıdent Qasym-Jomart Toqaev Norvegıa koroli Hokon VIII-ge taqqa otyrýyna baılanysty quttyqtaý jedelhatyn joldady.