Norvıchte demalys kúnderi komıks álemindegi Gotemde bolǵan oqıǵa shynaıy ómirde qaıtalandy: Betmen kostúmin kıgen jigit ury dep kúdiktelgen adamdy qýyp jetip, áıeldiń urlanǵan sómkesin qaıtaryp aldy, dep habarlaıdy infohub.kz saıty.
25 jastaǵy Sonnı Meıson senbi keshinde dosynyń kostúmdik keshine Betmen bolyp barǵan. Sol túni qaladaǵy túngi klýbqa kezekte turǵandar arasynda janjal shyǵyp, bireý áıeldiń sómkesin julyp áketkenin kórgen.
Meısonnyń sońyna «Fantasıkalyq tórttik» komıksiniń keıipkeri Mıster Fantasık jáne Betmen áleminiń taǵy bir keıipkeri Poison Ivy sıaqty basqa da komıks keıipkerleriniń kostúmin kıgen adamdar qosyldy.
Olar jolda kezdesken polıseıler tobyn toqtatyp, kómek surady, sodan keıin kúdiktini qýyp jetti. Alaıda kúdiktide sómke bolmaǵan.
Keıin alynǵan aqparat boıynsha, sómke urlanǵan jerden shamamen 300 metr qashyqtyqta, Norvıch soborynyń aınalasyndaǵy bıik shaqpaqtas qabyrǵanyń ústinen tabyldy.
Sómkeni áýeli dárethana qaǵazynyń oramymen túsirýge áreket jasaldy, biraq sátsiz aıaqtaldy. Sodan keıin áli de Betmen kostúminde bolǵan Meıson qabyrǵaǵa órmelep shyǵyp, sómkeni alyp tústi. Ol sómkeni ishindegi zattary tolyq saqtalǵan kúıde rıza bolǵan ıesine qaıtaryp berdi.
Oqıǵanyń kóp bóligi Meısonnyń TikTok paraqshasyna júktelgen beınejazbaǵa túsirilgen.
Ol oqıǵa týraly jazbasynda: «Dosymnyń týǵan kúnine arnalǵan túngi saýyqta bireý temeki qoraby úshin bireýdiń sómkesin ádeıi julyp áketti... Men Betmen, Poison Ivy, Mıster Fantasık jáne basqa da keıipkerler bolyp ony qýyp jettik», – dep jazdy.
Londondyq, kafede jumys isteıtin Meıson SWNS aqparat agenttigine bergen suhbatynda: «Men adamdardy Betmenge sál uqsaýǵa shabyttandyrǵym keledi. Qarańǵyda kostúm kıip júgirý emes, basqalarǵa kómektesý mańyzdy. Qabyrǵaǵa órmeleımin dep oılamaǵan edim», – dedi.
Ol sondaı-aq: «Árkimge sál Betmen kerek. Batyl, júrekti jáne meıirimdi bolý kerek. Plash nemese dýlyǵa kıgen-kımegenine qaramastan, bári osylaı ister dep úmittenemin», – dep qosty.
Meısonnyń aıtýynsha, ol shatyrdan sekirip túsýdi nemese bireýdi urýdy emes, tek báriniń jaǵdaıy jaqsy ekenine kóz jetkizgisi kelgen.
«Betmenniń máni osynda. Ol – qorǵaýshy. Túngi saýyqta bireýdiń tonalyp jatqanyn nemese ózin jaısyz sezingenin kórse, kóbirek adam osylaı ister dep úmittenemin. Muny isteý úshin sýperqaharman kostúmi qajet emes», – dedi ol.
Norfolk polısıasynyń ókili: «19 qyrkúıek senbi kúni Norvıchte túngi ekonomıkalyq patrúlde júrgen polıseılerge qoǵam múshesi júginip, joǵalǵan sómkeni tabýǵa kómek surady. Oqıǵa ornynda júrgizilgen tekserýlerden keıin sómke ishindegi zattary tolyq saqtalǵan kúıde tabylyp, ıesine qaıtaryldy», – dedi.