Nazarbaev ýnıversıtetiniń túlekteriniń barlyǵy derlik Qazaqstanda qalyp, jumys isteýde. Olardyń keıbiri tabysty mansap quryp qana qoımaı, óz kompanıalaryn ashyp, júzdegen adamdy jumyspen qamtyp otyr. Bul týraly infohub.kz saıty habarlaıdy.
NU túlekteriniń shamamen 98 paıyzy Qazaqstan ekonomıkasynyń ártúrli salalarynda bilimin qoldanýda – olardyń arasynda dárigerler, muǵalimder, ınjenerler, qarjygerler jáne saıasattanýshylar bar. Sonymen qatar, ýnıversıtet bilikti mamandarmen qatar, ekonomıkanyń damýyna tikeleı yqpal etetin kásipkerlerdi de daıyndaıdy.
Mine, óz jobalaryn ashqan NU túlekteriniń bes mysaly.
Aıan Bırımjan salaýatty tamaqtaný jelisi Health Project-ti quryp, Qazaqstanda Drinkit kompanıasynyń franchaızı-seriktesi atandy. Búginde onyń kompanıalary 200-den astam adamdy jumyspen qamtyp otyr.
Alısher Sharıazdanov – Qazaqstandaǵy eń jas dollarlyq mıllıoner. Ol 1,3 mlrd dollarǵa baǵalanǵan Higgsfield AI startapynda Founding Growth Manager bolyp jumys isteıdi. Bul startap Qazaqstandaǵy alǵashqy «edınorog» atandy. Kompanıa komandasynyń shamamen 90 paıyzy – NU túlekteri. Stripe dereginshe, Higgsfield AI kompanıasynyń aılyq kirisi shamamen 80 paıyzǵa ósýde, bul OpenAI kórsetkishinen úsh ese joǵary.
Máýlen Ahmetov segiz jyl buryn NU kampýsynda ınklúzıvti Kunde kofehanasyn ashyp, múmkindigi shekteýli adamdardy jumysqa ornalastyrdy. 2025 jyly Almatyda ekinshi kofehana ashyldy, ony iske qosý úshin eki kúnde 8 mln teńge qaıyrymdylyq jınaldy. Bul joba Qazaqstandaǵy eń tanymal áleýmettik kásiporyndardyń birine aınaldy.
Laýra Vaıgorova mektep oqýshylaryna álemniń úzdik joǵary oqý oryndaryna túsýge kómektesetin SmartestPrep (STP) bilim berý platformasyn qurdy. 2021 jyly startap sıngapýrlyq Quest Ventures qorynan 50 000 dollar tartty, al 2025 jyly Stenford ýnıversıteti janyndaǵy StartX akseleratoryna endi. Laýra sonymen qatar Forbes Kazakhstan basylymynyń kolýmnısi.
Erkebýlan Saparov ónim menedjmenti, derekterdi taldaý jáne jasandy ıntellekt boıynsha mamandar daıarlaýǵa arnalǵan Product Masters platformasyn qurdy. Joba IT mamandary tapshylyǵyn azaıtyp, daryndylardyń shetelge ketýin tejeýge kómektesedi.