Nuraı Serikbaıdyń ólimine qatysty iste jańa sot talqylaýy bolady. Ómir boıy bas bostandyǵynan aıyrýǵa sottalǵan Sherhan Aımahannyń qorǵaýshylary apelásıalyq shaǵym berdi, dep habarlaıdy infohub.kz.
Bul týraly jábirlenýshi taraptyń advokaty Aıanhan Omarov málimdedi. Onyń aıtýynsha, endi isti apelásıalyq satydaǵy sot qaraýy tıis.
«Nuraıdyń isi boıynsha sottalǵan Aımahan Sherhannyń qorǵaýshylary apelásıalyq shaǵym berdi. Men ony zerdelep, qarsy pikir daıyndaımyn. Endi is apelásıalyq satydaǵy sotta qaralatyn bolady», — dedi Omarov Threads-te.
Qorǵaýshylardyń shaǵymda qandaı dálelder keltirgeni jáne apelásıada nege qol jetkizgisi keletini týraly jábirlenýshi taraptyń advokaty ázirge naqtylaǵan joq.
Eske salaıyq, qaıǵyly oqıǵa 2026 jyldyń 11 qańtarynda Shymkentte bolǵan. Tergeý derekteri boıynsha, buryn qyzben tanys bolǵan 28 jastaǵy Aımahan Nuraı Serikbaıdy dúken mańynda kútip turyp, oǵan birneshe ólimge ákeletin pyshaq jaraqatyn salǵan.
Qylmys jasaǵannan keıin shabýyldaýshy jasyrynýǵa tyrysqan, alaıda kóp uzamaı qaladan shamamen 10 km qashyqtyqta ustalyp, tergeý ızolátoryna qamalǵan.
Sherhan Aımahan buǵan deıin 21 jastaǵy Nuraı Serikbaıdy óltirgeni úshin kináli dep tanylyp, ómir boıy bas bostandyǵynan aıyrýǵa sottalǵan. Endi oǵan shyǵarylǵan úkim apelásıalyq satyda tekseriletin bolady.