NVIDIA компаниясының бас директоры Дженсен Хуанг Қытай пайдасына тыңшылық жасады деп күдіктелген әйелмен қарым-қатынасы болғанын мойындады, деп хабарлайды infohub.kz сайты.
Қазан айының соңында New York Times газеті NVIDIA технологиялық компаниясының басшысы Дженсен Хуанг пен Сингапурдағы Megaspeed компаниясының жетекшісі Элис Хуангтың арасында «тығыз қарым-қатынас» болғанын жазды. Басылым АҚШ билігінің Элис Хуангтың Қытаймен байланысына қатысты алаңдаушылық білдіргенін нақтылады: ол АҚШ-та Қытай пайдасына тыңшылық жасауы мүмкін деп болжанған. Сондай-ақ АҚШ президенті Дональд Трампқа Американың ең ірі технологиялық компанияларының бірі басшысының түскен екіұшты жағдайы туралы мәлімделгені атап өтілді.
Axios редакциясының қолына Дженсен Хуанг қызметкерлеріне таратқан хат түсті. Онда ол әйеліне опасыздық жасағанын мойындаған.
«Отбасым мен баршаңыздан кешірім сұрауым керек. Мен әйеліме опасыздық жасадым. Менің әрекетім оған және балаларымызға ауыр тиді. Жасаған ісіме ақтау жоқ. Қатты өкінемін. Өмір бойы отбасым маған сүйіспеншілік пен қолдау көрсетті. Олар менің адалдығыма лайық. Бірақ мен олардың сенімін ақтамай, бірге құрған өмірімізді қираттым. Жасаған ісім мен келтірген ауыртпалығым үшін толық жауапкершілікті өз мойныма аламын және соған байланысты сынды қабылдаймын. Әйелім мен отбасыма: сіздерді жақсы көремін. Кешірім жасаған ісімді түзетпейтінін білемін. Отбасымыз бұдан арылады деп, уақыт өте сіздердің сенімдеріңізді қайта аламын деп үміттенемін. NVIDIA-дегі әріптестеріме, соның ішінде ондаған жыл бірге жұмыс істегендерге, сондай-ақ директорлар кеңесіне, серіктестер мен бүкіл әлемдегі акционерлерге: сіздер менен жақсырақ нәрсеге лайықсыздар», — деп жазды ол.
Дженсен Хуанг NVIDIA басшылығын «өмірінің басты артықшылығы» деп атады. «Менің парызым — сіздерге қызмет ету және сенімдеріңізге лайық болу. Мен бұл парызды атқара алмадым. Мен NVIDIA-ге толық берілгенмін және сенімдеріңізді қайтару жолында жұмыс істеймін», — деді ол.
Хуанг сондай-ақ NVIDIA директорлар кеңесі бас директордың Қытай тыңшысы деп күдіктелген әйелмен романынан туындауы мүмкін ұлттық қауіпсіздік мәселелеріне байланысты тәуелсіз тергеу бастағанын айтты. «Мен тергеуді қолдаймын және оған толық көлемде ынтымақтасамын. Мен елімді және компаниямызды жақсы көремін, NVIDIA-ні қорғауға және Американың ұлттық қауіпсіздігін қолдауға берілгенмін. Америкалық болғаныма мақтанамын және ризамын», — деп қосты ол.