Nú-Iork aspanynda qıraǵan Búkilálemdik saýda ortalyǵynyń egiz munaralarynyń sulbasy qaıta jańǵyrdy: sársenbi keshke 2977 jaryq dron qatysqan estelik shoý ótip, 11 qyrkúıek teraktileriniń 25 jyldyǵyna arnaldy, dep habarlaıdy infohub.kz saıty.
Bı-bı-sı uıymdastyrýshylarǵa silteme jasap habarlaǵandaı, ınstallásıa «Nú-Iork aılaǵy ústindegi 2977 ot» dep ataldy. Bul — 11 qyrkúıek teraktilerin bastan ótkergen qaýymdastyqpen, ıaǵnı qaza tapqandardyń otbasylarymen, aman qalǵandarmen jáne jedel qyzmet qyzmetkerlerimen birlesip, sýretshiler, prodúserler men qaýymdastyq ókilderiniń qatysýymen jasalǵan kópshilik kórkem joba.
NDTV telearnasynyń dereginshe, 2977 dron Gýdzon ózeniniń ústinen kóterilip, birtindep jaqyndaı otyryp, egiz munaralardyń kontýryn tolyq sáýlettik aýqymda qaıta jasady. Árbir ot 11 qyrkúıekte qaza tapqandardyń bireýin bildirdi. Aldymen apparattar túngi aspanǵa spırál boıymen kóterilse, keıin joıylǵan Búkilálemdik saýda ortalyǵynyń sulbasyna tizildi.
«„2977 ot“ jobasynyń maqsaty — qaza tapqandardy jáne 11 qyrkúıek oqıǵalaryn eske alý. Biz árbir jeke ómirdi kýálandyrý úshin dál sonsha ot jaǵamyz», — dedi jobanyń kreatıvti dırektory ári atqarýshy prodúseri Eddıson Mehr.
2001 jylǵy 11 qyrkúıek tańynda 19 terrorıst-qamıqashyq AQSH-ta tórt jolaýshy ushaǵyn basyp aldy, olardyń ekeýi Búkilálemdik saýda ortalyǵynyń bıik munaralaryna soǵyldy. Úshinshisi Pentagon ǵımaratyn tesip ótti, tórtinshisi Pensılvanıadaǵy Shanksvıll qalasynyń mańyna qulady. 2977 adam qaza tapty, taǵy 24 adam iz-túzsiz joǵaldy.
Eske salaıyq, jaqynda 11 qyrkúıek teraktileriniń boljamdy bas uıymdastyrýshysy jáne Gýantanamo bazasynda ustalyp otyrǵan taǵy úsh sybaılasy 2028 jyly sot aldyna shyǵatyny belgili boldy.