AQSh Ádilet mınıstrliginiń málimetinshe, Nú-Iorktegi Olbanı qalasynyń 35 jastaǵy turǵyny Djessıka Boýı shtat Kapıtolıine «Islam memleketi» shabyttandyrǵan shabýyl josparlady degen kúdikpen ustalyp, aıyp taǵyldy.
Ulttyq qaýipsizdik jónindegi bas prokýrordyń kómekshisi Djon A. Aızenbergtiń aıtýynsha, Boýı Kapıtolıge jarylǵysh qurylǵy ornatyp, memlekettik qyzmetkerlerdi óltirip, ǵımaratty múmkindiginshe qıratyp, sodan keıin Sırıadaǵy «Islam memleketi» baqylaıtyn aýmaqqa qashýǵa nıettengen.
Ádilet mınıstrliginiń habarlaýynsha, Boýı sársenbi kúni ózi jarylǵysh qurylǵy dep oılaǵan zatty alǵannan keıin qamaýǵa alyndy. Ol buǵan deıin Kapıtolı aýmaǵynda baıqalyp, ǵımarattyń sýretterin túsirgen.
Ádilet mınıstrliginiń málimetinshe, Boýı óz maqsatyn sıpattaı kele, shabýyldyń «amerıkandyq júıege áser etkenin» qalaıtynyn aıtqan. Sondaı-aq ol 11 qyrkúıektegi shabýyldardy madaqtap, antıamerıkandyq habarlamalar taratqan. Eske salaıyq, 11 qyrkúıekte ál-Qaıda sodyrlary komersıalyq ushaqtardy urlap, olardy Búkilálemdik saýda ortalyǵy men Pentagon ǵımaratyna, sondaı-aq Pensılvanıa shtatyndaǵy Shanksvıll mańyndaǵy alańǵa qulatqan bolatyn.
Boýıdiń advokatyna dereý túsinikteme alý múmkin bolmady.
Boýı ustalǵannan keıin Nú-Iork gýbernatory Ketı Hokýl shtat Kapıtolıinde jáne jalpy úkimet ǵımarattarynda qaýipsizdik sharalaryn kúsheıtý týraly sheshim qabyldaǵanyn, sebebi saıası zorlyq-zombylyq pen memlekettik qyzmetkerlerge qaýip tóndirý jaǵdaılary artqanyn málimdedi. «Qazirgi ýaqytta tikeleı qaýip joq, biraq biz Nú-Iork turǵyndaryn qorǵaý jáne qaýymdastyqtarymyzdyń qaýipsizdigin qamtamasyz etý úshin quqyq qorǵaý organdarymen tyǵyz jumys isteı beremiz», — dedi ol málimdemesinde.