Aǵylshynnyń ataqty Oasis rok-toby buryn esh jerde jarıalanbaǵan jazbalarynyń aýksıonda satylýyna qarsy zańdyq shara qoldanyp, saýda-sattyqty toqtatty. Bul týraly infohub.kz saıty habarlaıdy.
Áńgime 63 tikeleı konsert jazbasy, kóptegen saǵattyq daıyndyq materıaldary jáne Noel men Lıam Gallaherdiń arasyndaǵy beıresmı áńgimeleri bar jınaq týraly bolyp otyr. Qyrkúıek aıynda Anglıanyń Výstershır graftyǵyndaǵy Littleton Auctions aýksıon úıi toptyń burynǵy dybys ınjeneri Hú Rıchards jınaǵan bul koleksıany 1,2 mıllıonnan 1,6 mıllıon fýnt sterlıńke deıingi baǵamen saýdaǵa qoıǵan edi.
Rıchards Oasis tobymen 1994 jyly shyqqan «Definitely, Maybe» atty tuńǵysh álbomynan bastap 2001 jylǵa deıin jumys istegen. 209 DAT taspasy, 73 analogtyq kasseta jáne úsh MiniDisc-ten turatyn jınaqty dybys ınjeneriniń uly Oýaın Rıchards satpaq bolǵan.
«Littleton Auctions aýksıon úıi Oasis jazbalary retinde tanymal The Desk Tapes koleksıasynyń 3 qazanda ótetin saýda-sattyqtan zańdyq is-qımyldarǵa baılanysty alynyp tastalǵanyn rastaıdy. Biz bul mańyzdy muraǵatty josparlanǵandaı usyna almaıtynymyzǵa qatty ókinemiz», — dedi aýksıon úıiniń basqarýshy dırektory Ben Homer BBC-ge.
Qyrkúıekte The Times basylymyna bergen suhbatynda Oýaın Rıchards, ózi de dybys ınjeneri, bul jınaqty «tarıhtyń bir bólshegi» dep ataǵan. Onyń aıtýynsha, aýdıojazbalar áli de jaqsy jaǵdaıda saqtalǵan, alaıda zıatkerlik menshik quqyǵy Oasis tobynda qalǵandyqtan, yqtımal jańa ıesi olardy toptyń kelisiminsiz jarıalaı almaıdy.
«Oasis meni jáne ákemdi kóp jyldar buryn ákem jasaǵan taspalardyń aýksıonyn ótkizbeý úshin sotqa bergeni ras. Biz taspalardyń aýksıonyn keıinge qaldyrýǵa kelistik, bul zańdyq daýdy sot arqyly nemese ózge de tártipti jolmen sheshýge múmkindik beredi», — dedi Rıchards sársenbide BBC-ge.
Littleton Auctions senbidegi aýksıonyn jalǵastyrady. Onda Rıchardstyń koleksıasyndaǵy túpnusqa Kangol Oasis týrne kýrtkasy, qol qoıylǵan Nirvana fotolary, Rolling Stones músheleriniń ekeýiniń qoltańbasy jáne Braıan Meı qol qoıǵan gıtara syndy basqa da mýzykalyq jádigerler satylymǵa qoıylady.
«Qalǵan saýda-sattyqqa bul áser etpeıdi, ol ádettegideı ótedi. Biz zańdyq prosesti qurmetteımiz jáne osy kezeńde is boıynsha qosymsha túsinikteme bermeımiz», — dedi Homer.
Ótken aıda Noel men Lıam Gallaher Venesıa kınofestıvalinde «Oasis: Don’t Look Back in Anger» derekti fılminiń álemdik tusaýkeserine, sodan keıin Londondaǵy Ulybrıtanıalyq tusaýkeserine qatysqan. Top sondaı-aq 2025 jylǵy sátti qaıta birigý týrnesinen keıin Live ’27 álemdik týrnesin jarıalady.
Oasis tobynan túsinikteme suralǵan.