Reseıde asa qaýipti ınfeksıaǵa kúdik týraly habar taraǵan soń Qazaqstan Densaýlyq saqtaý mınıstrligi qabyldanǵan aldyn alý sharalary týraly málimdedi, dep habarlaıdy infohub.kz saıty.
Qazaqstan Respýblıkasy Densaýlyq saqtaý mınıstrliginiń saıtyndaǵy aqparatqa sáıkes, vedomstvo Irkýtsk oblysyndaǵy ahýaldy belsendi baqylap otyr. Qazaqstanda bul másele turaqty baqylaýda, aldyn alý sıpatyndaǵy sharalar qabyldandy.
«Memlekettik shekaradan ótetin ótkizý pýnktterinde sanıtarlyq-karantındik baqylaý júrgizilýde. Barlyq kólik túrlerinde dene qyzýy joǵary, aýrý belgileri bar nemese asa qaýipti ınfeksıaǵa kúdikti adamdar anyqtalǵan joq. Aldyn ala baǵalaý boıynsha, Qazaqstanǵa ınfeksıa ákelý qaýpi tómen kúıinde qalyp otyr. Resmı aqparat kelip túsken saıyn ahýalǵa berilgen baǵa men qabyldanyp jatqan sharalar naqtylanatyn bolady», — dep naqtylady mınıstrlikte.
Qazaqstandyqtarǵa eskertý jasaldy: sapardan keıin aýrý belgileri paıda bolsa, der kezinde medısınalyq kómekke júginip, dárigerge bolǵan jerleri men sapar kúnderin aıtý qajet.
«Qolda bar derekterge qaraǵanda, qazirgi tańda reseılik mamandar epıdemıologıalyq tergeý júrgizip jatyr. Túpkilikti dıagnoz ázirge resmı túrde rastalǵan joq, yqtımal juqpa kózi men jaǵdaıy anyqtalýda. Medısınalyq baqylaýda 197 baılanysta bolǵan adam bar. Qolda bar derekter boıynsha, olarda aýrý belgileri anyqtalǵan joq, zerthanalyq zertteý nátıjeleri teris. Shelehov aýdandyq aýrýhanasynda qajetti epıdemıaǵa qarsy sharalar júrgizilýde», — dep qosty Densaýlyq saqtaý mınıstrliginde.
Vedomstvoda atap ótkendeı, Rospotrebnadzordyń sońǵy derekteri boıynsha Irkýtsk oblysynda, Irkýtskide jáne Shelehovte sanıtarlyq-epıdemıologıalyq ahýal turaqty, oba jaǵdaılary tirkelgen joq. Irkýtsk oblysynda 28 jastaǵy áıeldiń ólimi etıologıasy anyqtalmaǵan pnevmonıa retinde sıpattalýda.
Eske salaıyq, buǵan deıin BAQ Reseıdiń Irkýtsk oblysynda obaǵa qarsy ınstıtýt qyzmetkeri obaǵa kúdikpen kóz jumǵanyn habarlaǵan bolatyn. Marqum dıagnostıka úshin bıomaterıal jınap jatqanda zerthanada qaýipti bakterıa salynǵan probırkany abaısyzda syndyryp aldy dep boljanǵan.