Qazaqstanda ókpe qaterli isigi týraly habardarlyq aptalyǵy bastalady. Osy aıasynda táýekel tobyndaǵy azamattar aýrýdy erte anyqtaý úshin tómen dozaly kompúterlik tomografıadan tegin óte alady, dep habarlaıdy infohub.kz saıty.
Qazaq onkologıa jáne radıologıa ǵylymı-zertteý ınstıtýtynyń mamandarynyń aıtýynsha, aksıa 10-15 tamyz aralyǵynda ótip, eldegi barlyq onkologıalyq ortalyqtarda biryńǵaı qabyldaý kúnimen aıaqtalady. Osy kezeńde 50 jastan asqan qazaqstandyqtar, temeki shegý ótili uzaq azamattar, burynǵy temeki shegýshiler, sondaı-aq zıandy óndiris qyzmetkerleri tegin tekseristen óte alady.
Onkologtar ókpe qaterli isigi uzaq ýaqyt sımptomsyz ótetinin, sondyqtan jyl saıyn shamamen 2 myń qazaqstandyq tym kesh qoıylǵan dıagnozdan qaıtys bolatynyn atap ótedi. Al elde jyl saıyn «ókpe qaterli isigi» dıagnozyn 4 myńǵa deıin azamat estıdi.
Buǵan deıin Almatyda 2026 jyldyń alǵashqy alty aıyndaǵy profılaktıkalyq tekserý qorytyndysy shyǵarylǵany habarlanǵan bolatyn: qala turǵyndarynan 250-den astam qaterli isik jaǵdaıy anyqtaldy. Sonymen qatar, teri, súıek jáne jumsaq tinder sarkomasyn erte anyqtaýǵa arnalǵan ashyq esik kúninde segiz pasıentten qaterli isikke kúdikti isikter, al 28 adamnan isik aldy jaǵdaılar tabyldy.
Sondaı-aq, Almatyda 250 tósekke arnalǵan zamanaýı onkoortalyq paıda bolatyny belgili boldy. Joba memlekettik saraptamadan ótken. Medısınalyq mekeme robototehnıkasy bar operasıalyq blokpen, molekýlalyq-genetıkalyq zerthanamen jáne dári-dármek daıyndaýdyń avtomattandyrylǵan júıesimen jabdyqtalady, bul qaterli isikti erte kezeńde anyqtaýǵa jáne joǵary tehnologıalyq kómek kórsetýge múmkindik beredi.