Kóptegen ata-ana balanyń murnyna ádetpen oksolın maıyn jaǵyp, bul balany sýyq tıýden saqtaıdy dep oılaıdy. Qazaqstandyq pedıatr Nurjamal Áýbákirova mundaı ádistiń múldem paıdasyz, tipti belgili bir dárejede qaýipti ekenin túsindirdi, dep habarlaıdy infohub.kz saıty.
«Jaqynda qabyldaýymda bes aılyq balasy bar otbasy boldy. Balany vırýstan qorǵaý úshin anasy náresteniń murnynyń ishine oksolın maıyn jaqqany belgili boldy. Munyń kóptegen ata-ana úshin áli de qalypty jaǵdaı ekenin túsindim. Al bulaı isteýge bolmaıdy», – dedi dáriger.
Pedıatrdyń aıtýynsha, oksolın maıy tıimsiz, óıtkeni muryn qýysynda ár adamda kirpiksheli epıtelı bar. Dál sol vırýstarǵa qarsy jumys isteıdi.
«Bul kirpiksheler sypyrǵysh sıaqty jumys isteıdi. Murynǵa vırýs túskende, bul túkter ony muryn qýysynan syrtqa qaraı sypyryp shyǵarady. Al oksolın maıyn jaqqanda, sol kirpikshelerdi qozǵalyssyz qaldyrasyz. Sóıtip, bala vırýstardan tabıǵı qorǵanysynan aıyrylady. Sondyqtan muryn qýysyna oksolın maıyn jaǵýǵa bolmaıdy», – dep túsindirdi ol.
Balany qalaı qorǵaý kerek
Áýbákirovanyń aıtýynsha, shyn máninde bári óte qarapaıym. Kirpikshelerdiń murynda jaqsy qozǵalýyn jalǵastyrý úshin belgili bir jaǵdaılar jasaý kerek.
«Ol úshin bala bolatyn bólmede salqyn, ylǵaldy aýany ustaý qajet. Óıtkeni qurǵaq aýada kirpiksheler baıaý qozǵalady. Sondaı-aq tuzdy eritindilerdi qoldanyp, muryn qýysyn ylǵaldandyrýǵa bolady», – dep keńes berdi dáriger.
Buǵan deıin pedıatr tanymal «Stopdıar» jáne «Enterofýrıl» preparattary balalardyń qusýy men ish ótýi kezinde paıdasyz ekenin aıtqan.