Múnhendegi Oktoberfestte áıelder men qyzdarǵa kóılek astynan jasyryn túsirip alýdyń aldyn alý úshin tegin veloshorty taratylyp jatyr, dep habarlaıdy infohub.kz saıty.
Múnhende shyǵatyn Süddeutsche Zeitung gazetiniń málimetinshe, «Toıfelsrad» atraksıonyndaǵy áıelderdiń keminde 32 myń beınejazbasy taralymda júr. Keıbirine mıllıondaǵan qaralym jınalǵan.
BR telearnasynyń tergeýi bul beınelerdiń artynda Ýkraınadan kelgen kásibı YouTuber-ler toby men Bavarıanyń birneshe turǵyny turǵanyn anyqtady. Bir áıel bir ǵana beınejazbadan 9 myń eýro (7 650 fýnt sterlıń) tabys tapqan.
«Toıfelsrad» atraksıonynyń operatory Elızabet Polası Bı-bı-sıge sońǵy úsh jyl boıy kóılek kıgen áıelder men qyzdarǵa olardy tobyr arasynda túsirip alýdan qorǵaý úshin tegin veloshorty taratyp júrgenin aıtty. Bıylǵy Oktoberfestte ol 100-den astam jup shorty taratqan.
«Adamdar ózderin qaýipsiz sezinýi úshin qolymnan kelgenniń bárin jasaǵym keledi», — deıdi ol.
Qazir 80 jastaǵy Polası veloshorty taratý arzanǵa túspeıtinin, biraq óz júreginiń tynyshtyǵy úshin oǵan turarlyq ekenin aıtty. «Toıfelsrad» shatyrynda adamdardyń ıýbkasynyń astynan túsirýge qarsy nemis jáne aǵylshyn tilderindegi belgiler men polısıa plakattary ilingen. Alaıda Polasıdiń sózinshe, smartfonmen túsirip jatqandardyń bárin baqylaý múmkin emes.
Bıylǵy syra festıvalindegi keıbir daıashy áıelder de dırndl astyna veloshorty kıe bastaǵanyn aıtady.
Bavarıa polısıasynyń ókili Bı-bı-sıge 2025 jyldan beri Oktoberfestte ıýbka astynan túsirýge qarsy plakat naýqany júrgizilip jatqanyn málimdedi.
Bıyl polısıa nemis áıeliniń dırndliniń astynan telefonymen túsirgeni úshin 45 jastaǵy shveısarıalyq er adamdy ustady. Ótken jyly mundaı áreket úshin 10 adam, al 2024 jyly jeti adam ustalǵan.
Sıfrlyq zorlyq-zombylyq qurbandaryn qoldaýdy maqsat etetin nemistiń Hate Aid komersıalyq emes uıymyn basqaratyn Jozefın Balon Bı-bı-sıge qazirgi zań ıýbka astynan túsirýden jetkilikti qorǵanys bermeıtinin aıtty.
Onyń sózinshe, jańa zań jobasy josparlanyp otyrǵanymen, qoldanystaǵy zańnama «ıýbka astynan túsirgende ǵana» qoldanylady, al ıýbka jaı ǵana kóterilip, sýretke túsip qalǵan jaǵdaıǵa qatysty emes. Ol jańa kameralyq kózildirikterdi de qaýip dep sanaıdy.
Balon ınternette áıelderdiń ıntımdik sýretterin jarıalaǵandardy, sondaı-aq olardy ornalastyrǵan platformalardy da jazalaýdy qalaıdy.
Sonymen qatar Múnhen qalasy áleýmettik jelidegi jazbalarynan tabys tabatyn jáne Oktoberfestte túsirýge nıettenetin ınflúenserler men kontent jasaýshylarǵa qatysty talapty qatańdatýǵa tyrysty.
Múnhen festıválden tikeleı efır taratýǵa tyıym salyp, onda túsirgisi kelgen árkimnen qala beretin aqyly ruqsattama talap etedi.
Bıyl ınflúenserlerge júzdegen lısenzıa berilgen. Olar ónimdi ornalastyrý nemese demeýshilik arqyly tabys tabady.