Qazaqstan Respýblıkasynyń Oqý-aǵartý mınıstrligi bolashaq birinshi synyp oqýshylarynyń ata-analaryna mektepke qujat tapsyrýdy keıinge qaldyrmaýdy usynyp otyr, dep habarlaıdy infohub.kz saıty.
Vedomstvo 1 qyrkúıekte birinshi synypqa 380 myńnan astam bala baratynyn eske saldy. Qujat qabyldaý jalǵasýda, qazirgi ýaqytta shamamen 320 myń bala qabyldandy, bul boljamdy sannyń shamamen 84 paıyzyn quraıdy.
Olardyń shamamen 296 myńy memlekettik mektepterde, al 23 myńǵa jýyǵy jeke mektepterde oqıtyn bolady. Qalalyq mektepterge shamamen 191 myń bala, aýyldyq mektepterge shamamen 128 myń bala qabyldandy. Sonymen qatar, erekshe bilim berý qajettilikteri bar 4 myńǵa jýyq bala bilim berý uıymdaryna qabyldandy.
Birinshi synypqa baratyn balalardyń 71 paıyzdan astamy qazaq tilinde oqytatyn synyptardy, 26 paıyzdan astamy orys tilinde oqytatyn synyptardy, al shamamen 2,5 paıyzy basqa tilderde oqytatyn synyptardy tańdaǵan. Sonymen qatar, basqa ult ókilderiniń 2 myńnan astam balasy qazaq tilinde oqytatyn synyptarǵa qabyldandy, bul ata-analardyń balalaryn memlekettik tilde oqytýǵa degen qyzyǵýshylyǵynyń artyp kele jatqanyn kórsetedi.
Ótinishter 2026 jyldyń 27 mamyry men 31 tamyzy aralyǵynda bekitilgen kestege sáıkes kezeń-kezeńimen qabyldanady. Ata-analardyń shamamen 84 paıyzy ótinishterin elektrondy formatta bergen. Qujattardy eGov.kz elektrondy úkimet portaly, eGov Mobile mobıldi qosymshasy nemese tańdalǵan mektepte tikeleı rásimdeýge bolady.
Eń kóp birinshi synyp oqýshylary Túrkistan oblysynda kútilýde — 50 myńnan astam bala, Almaty oblysynda — 35 myńnan astam, Astanada — 33 myń, Almatyda — 31 myńnan astam jáne Shymkentte — 29 myńnan astam. Bul atalǵan aımaqtardaǵy halyq sany men týý deńgeıiniń joǵary bolýyna baılanysty.
Mınıstrlik: «Oqý-aǵartý mınıstrligi ata-analarǵa qujattardy ýaqytyly rásimdeýdi usynady. Qosymsha aqparatty tańdalǵan mektepten, eGov.kz portalynan jáne eGov Mobile qosymshasynan alýǵa bolady», — dep atap ótti.