Almaty oblysynda jaıly mektepterdiń birinde oqýshylardyń ata-analary kútpegen máselege tap boldy: balalaryna oqýlyqtar jetispeı, materıaldardy ózderi basyp shyǵarýǵa májbúr boldy. Bul jaǵdaıǵa oblystyq bilim basqarmasy túsinikteme berdi, dep habarlaıdy infohub.kz saıty.
«Prezıdentke hattar» Telegram-arnasynda qazaqstandyq azamatshanyń ótinishi jarıalandy. Ol balasynyń elektrondy nusqadan basyp shyǵarylǵan oqýlyqtarmen oqýǵa májbúr ekenin aıtty. Áıel qalyptasqan jaǵdaıǵa tańdanys bildirip, bul otbasyna qosymsha qolaısyzdyq týdyratynyn atap ótti.
Post astyndaǵy pikirlerde Almaty oblysy bilim basqarmasynyń ókilderi Qarasaı aýdanyndaǵy Almalybaq aýylynda ornalasqan jaıly mekteptiń tórtinshi synyptary týraly ekenin naqtylady. Vedomstvo oqý jylynyń basynda oqýshylar sanynyń artýyna baılanysty jekelegen oqýlyqtardyń ýaqytsha jetispeýshiligi oryn alǵanyn túsindirdi. Oqý prosesin toqtatpaý úshin oqýshylarǵa ýaqytsha elektrondy nusqalar men qoljetimdi materıaldardy paıdalaný múmkindigi berildi.
Sonymen qatar, basqarmada oqýlyqtardy tolyq kólemde A4 formatynda qaǵazǵa basyp shyǵaryp, mektepke ákelý mindetti talap qoıylmaǵanyn atap ótti. «Elektrondy oqýlyqtardy qaǵazǵa basyp shyǵarý ata-analar úshin mindetti emes», — dedi sheneýnikter.
Qazir Qarasaı aýdanynda qosymsha oqýlyqtar satyp alynýda. Olar dúısenbide, 7 qyrkúıekte mektepterge jetkiziledi dep kútilýde. Osylaısha, másele jaqyn arada sheshilýi tıis.
Eske salaıyq, buǵan deıin Shymkentte de mektep oqýshylarynyń ata-analary oqý jylynyń basynda alynǵan oqýlyqtardyń jaǵdaıyna narazylyq bildirgen bolatyn.