Kókshetaýlyq «Okjetpes» fýtbol klýby Qazaqstan Premer-Lıgasynyń 18-týry aıasynda Taldyqorǵannyń «Jetisý» komandasyn 2:0 esebimen jeńdi, dep habarlaıdy infohub.kz.
Kezdesý Kókshetaýdaǵy «Okjetpes» stadıonynda ótip, alań ıeleriniń jeńisimen aıaqtaldy. Esep birinshi taımnyń 22-mınýtynda ashyldy: belarýstik jartylaı qorǵaýshy Dmıtrı Borodın penaltıdi dál oryndady. Ekinshi taımnyń qosymsha ýaqytynda alańǵa shyqqan qazaqstandyq shabýylshy Toqtar Janǵylyshbaı «Okjetpestiń» basymdyǵyn eseledi. Bul gol qonaqtardyń sany az bolǵan kezde soǵyldy: 75-mınýtta serbıalyq jartylaı qorǵaýshy Marko Jıvanovıch ekinshi sary qaǵazdy alyp, alańnan qýyldy.
Bul jeńis kókshetaýlyqtarǵa 30 upaı jınap, QPL týrnır kestesinde úshinshi orynǵa kóterilýge múmkindik berdi. «Jetisý» 18 upaımen 11-orynda qalyp otyr.