Sankt-Peterbýrgtiń Nevskı aýdandyq soty «Masáná» mýltserıalynyń avtory Oleg Kývaevke syrttaı úkim shyǵardy, dep habarlaıdy infohub.kz saıty.
Sankt-Peterbýrg sottarynyń Telegram-arnasynda «Masáná» múltfılmderiniń avtory Oleg Kývaevke qatysty úkim jarıalandy. Reseıde ol áldeqashan sheteldik agent dep tanylǵan.
«Kývaev Reseı Federasıasynyń sheginen tys jerde bola tura, ádeıi áreket etip, óz áreketteriniń quqyqqa qaıshy sıpatyn túsine otyryp, YouTube-tegi «Masyanya Kuvaeva» ashyq arnasynda «Masáná. 169-epızod. Idolıada» beınejazbasyn ornalastyrdy, ol shekteýsiz adamdar tobyna qoljetimdi. Atalǵan beınejazbada Reseı Federasıasynyń Qarýly Kúshteriniń áskerı qyzmetshilerin tutqynǵa túsýge, dezertırlikke, áskerı basshylyqtyń buıryqtaryn oryndamaýǵa ashyq úndeýler, sondaı-aq Ýkraına Qorǵanys mınıstrliginiń qoldaýymen qurylǵan «Hochý jıt» — «Reseı áskerı qyzmetshileriniń tutqynǵa túsý jónindegi ótinishteriniń biryńǵaı ortalyǵy» jobasynyń jarnamasy bar. Beınejazbany paıdalanýshylar keminde 1 283 890 ret qaraǵan, bul onyń ashyq jáne jalpyǵa qoljetimdi sıpatyn rastaıdy», — dedi sotta.
Sondaı-aq ol sheteldik agent mindetterin oryndaýdan jaltardy dep aıyptaldy. Oǵan syrttaı jalpy rejımdegi túzeý kolonıasynda 4 jyl 1 aı bas bostandyǵynan aıyrý jazasy taǵaıyndalyp, ınternette jarıalanymdar ornalastyrýǵa baılanysty qyzmetpen aınalysý quqyǵynan 4 jylǵa aıyryldy.
«Masáná» — satıralyq serıaldyń saıtynda jazylǵandaı, kóńildi ári qarapaıym ómirlik nárseler týraly qarapaıym múltfılmder toptamasy. Máńgi jasyl optımızm, ómirdi bekitetin sınızm jáne ómirdiń qanshalyqty ádemi ekeni týraly.
Basty keıipker — Masáná esimdi qyz jáne onyń eki dosy Hrúndel men Lohmatyı. Keıde Máskeýden kelgen glamýrly boıjetken Láska paıda bolady.
Avtory ári sýretshisi — Oleg Kývaev. 1967 jyly Sankt-Peterbýrgte dúnıege kelgen. 2001 jylǵa deıin, anımasıamen aınalyspaı turǵanda, músin óneri men keskindememen áýestengen. Keıin kompúterlik grafıkaǵa degen qyzyǵýshylyǵy mýltserıal jasaý jumysyna ulasty.