Reseıdiń Omby qalasyndaǵy qurylys alańynda bolǵan órt saldarynan eki er adam qaza tapty, olardyń biri Qazaqstan azamaty edi. 24 jastaǵy Maksım Bagınskı denesiniń shamamen 70 paıyzyn kúıik alǵan bolatyn, ol 18 tamyzda aýrýhanada qaıtys boldy, dep habarlaıdy infohub.kz.
TASS málimetinshe, qaıtys bolǵan azamat nysannyń merdigeri bolǵan «Global ınjınırıń» kompanıasynda jumys istegen. Reseıdiń Tergeý komıteti jas jigittiń osy uıymnyń qyzmetkeri bolǵanyn rastady.
Qazaqstan Respýblıkasy Syrtqy ister mınıstrligi otandasymyzdyń qazasyn rastady. Vedomstvonyń resmı málimdemesinde: «Qazaqstan Respýblıkasy Syrtqy ister mınıstrligi 2026 jylǵy 18 tamyzda Omby qalasynda bolǵan órt saldarynan qaza tapqan Qazaqstan Respýblıkasy azamatynyń týǵan-týystary men jaqyndaryna shyn júrekten kóńil aıtady», — delingen.
Qazaqstannyń Ombydaǵy Bas konsýldyǵy qaıtys bolǵan azamattyń otbasyna qajetti qujattardy rásimdeýge kómek kórsetip, Reseıdiń quzyrly organdarymen baılanysta. SİM týystarymen baılanysta ekenin de atap ótti.
Oqıǵaǵa baılanysty Reseıde eńbekti qorǵaý talaptaryn buzý baby boıynsha qylmystyq is qozǵaldy. Tergeý órttiń sebepterin jáne qurylys alańyndaǵy jumysshylardyń qaýipsizdigine jaýapty adamdardy anyqtap jatyr.
Reseı arnaıy qyzmetteriniń dereginshe, barlyǵy 11 adam zardap shekti. Eń aýyr kúıik alǵan eki naýqas buǵan deıin Nıjnı Novgorodqa jetkizilgen.