Sum ómir, sulý dúnıe, aldadyń ba?
Tán aryp, tamyrda qan qalmadyń ba?
Jalǵan úshin jan qıyp, japa shektim,
Eńbegim, eki bolyp, janbadyń ba?
Jaıshylyqta jan qıǵan, jaqyn dúnıe,
Talyp tursam, nazaryń salmadyń ba?
Ortekedeı orǵytyp, oqqa jyǵyp,
Jalmaýyz jaýyz jalǵan, jalmadyń ba?
Arsyz násip, armansyz aldadyń ba?
Qaırymsyz qanjyǵańdy qandadyń ba?
Qomaǵaı qorqaý ajal, qoınyń ashyp,
Qapa men qaıǵyǵa qol jalǵadyń ba?
Aldandym, aljastyrdyń, ańǵyrttandym,
Aqylsyz ańqaý basym, andadyń ba?
Qımas dos, qyspaqta bop, jylattyń ba?
Qaıǵymen qan jutqyzyp, sulattyń ba?
Qasiretti qasapshynyń eshkisindeı
Qurym ilip, qudyqqa qulattyń ba?
Qubyldyń, quıqyljydyń, Qurtqa dúnıe,
«Qyzyqpaımyn» desem de, shydattyń ba?
Ar-uıat, adamdyqty aram qylyp,
Bárin saǵan jumsadym, qýanttyń ba?
Sen úshin jaqynymdy jat qylyp em,
Qaıyrylyp, qam kóńilimdi jubattyń ba?
Melshıgen, meıirimsiz, meńireý dúnıe,
Aldap ap, aıyzyńdy qandyrdyń ba?
Qazynany urlaǵan qaraqshydaı,
Bas salyp, basqa buǵaý saldyrdyń ba?
Jaý tonaǵan adamdaı jáýdiretip,
Adamzattyq arymdy aldyrdyń ba?
Keterińe kelgende, kázzap dúnıe,
Túlkideı quıryǵyńdy shaldyrttyń ba?
Qapasta qan azaıyp, qajyr muqap,
Qalashynyń ıtindeı qańǵyrttyń ba?
Ázelde alysqa ushqan dám men tuzym,
Táýekel, tasqa qondym, Táńirim saqtar.
Jerlerge topyraq tartqan san aınaldym,
Degen janmyn: «Qunymdy Qudaı joqtar!»
Adam basy - Allanyń doby bolsa,
Taǵdyrdan tabandatyp tıdi shoqpar.
Jalyndym, jantalastym, jalbaryndym,
Tımedi eshbir rahym Táńirim jaqtar.
Mahpýzdyń taqtaıyna jazǵan jumys
Buıryqty jerlerine baryp toqtar.
Basqadan meniń janym baǵaly ma,
Talaı jan tap jolynda boldy kókpar!
Qıadan sóz tabatyn aqyl bar ma,
Tyndaıtyn boıym balqyp naqyl bar ma?
Esil sózim esepsiz bosqa ketse,
Obaly jaýlyǵy joq qatyndarǵa!

---