Chehıalyq Omnipol Defence a.s. kompanıasy Aqtóbe oblysyna L-410 ushaqtaryn jetkizý múmkindigin qarastyryp jatyr. Oblys ákimi Asqat Shaharovtyń aıtýynsha, jobany qarjylandyrý máseleleri Ónerkásipti damytý qorymen birlesip pysyqtalýda, dep habarlaıdy infohub.kz saıty.
Ákim ushaqtardy jetkizý máselesin Omnipol Defence a.s. dırektorlar keńesiniń tóraǵasy Artem Movsesánmen kezdesýde talqylady.
Onyń aıtýynsha, ushaqtardy jetkizýdiń oblys úshin mańyzy zor, óıtkeni munda shaǵyn avıasıany belsendi damytý josparlanyp otyr. Sonymen qatar oblys aldynda mamandar daıarlaý jáne óńirlik áýe qatynasyn jolǵa qoıý úshin qajetti ınfraqurylym qurý mindeti tur.
Budan bólek, Shaharov Shalqarda áýejaı salýǵa jarıalanǵan konkýrs týraly aıtyp berdi.
Óz kezeginde Omnipol ókilderi ushaqtardy paıdalanýǵa qajetti jerústi jabdyqtaryn daıyndaýǵa qatysýǵa kelisti.
Artem Movsesán holdıń quramynda shaǵyn jáne orta áýejaılardyń ınfraqurylymyna mamandanǵan Omnipol Airports degen jeke baǵyt jumys isteıtinin atap ótti. Kompanıa jaryq sıgnaldyq jabdyq, áýe qozǵalysyn basqarý jáne navıgasıa júıeleri boıynsha sheshimder usynýǵa daıyn.
Aıta keteıik, L-410 ushaqtary Qazaqstanda áldeqashan paıdalanylyp keledi. Talǵat Begeldınov atyndaǵy Áýe qorǵanysy kúshteriniń áskerı ınstıtýty 2023 jyldan beri Aqtóbede eki L 410 UVP-E20 ushaǵyn ornalastyryp otyr. Taǵy tórt L 410 NG ushaǵy Qazaqstan Respýblıkasy Tótenshe jaǵdaılar mınıstrliginiń «Qazavıaspas» AQ paıdalanýynda.
L-410 — 19 jolaýshyǵa deıin syıdyratyn, shaǵyn jáne orta qashyqtyqqa tasymaldaýǵa arnalǵan týrbovıntti ushaq. Bul tıptegi ushaqtar ushý-qoný jolaǵy salystyrmaly túrde qysqa áýeaılaqtarda da paıdalanyla alady, bul jergilikti áýejaılar jelisin damytý úshin mańyzdy.
Buǵan deıin «Kýrsıv» jazǵandaı, Air Astana bas atqarýshy dırektory (SEO) Ibrahım Janlyel Qazaqstannan Nú-Iork pen Tokıoǵa tikeleı reısterdi oryndaýǵa arnalǵan alǵashqy Boeing 787 Dreamliner ushaqtary respýblıkaǵa osy jyldyń jeltoqsanynda keletinin málimdegen edi.