Ońtústik Koreıa prezıdenti Lı Chje Men Qazaqstan prezıdenti Qasym-Jomart Toqaevqa jáne Ulttyq qaýipsizdik komıtetine qylmyskerlerdi ustaýǵa kómekteskeni úshin alǵys bildirdi, dep habarlaıdy infohub.kz.
Lı Chje Men óziniń X áleýmettik jelisindegi paraqshasynda qazaq tilinde jazba jarıalap, Kambodja men Vetnam arqyly Qazaqstanǵa zańsyz kirgen jáne óz eliniń azamattaryna qarsy telefon alaıaqtyqpen aınalysqan Koreıa Respýblıkasynyń uıymdasqan qylmystyq tobynyń músheleri ustalǵannan keıin eki apta ishinde elge qaıtarylyp, qazir tergeý amaldary júrip jatqanyn atap ótti.
«Ustaýdan deportasıaǵa deıingi jumystyń jedel oryndalýy Qazaqstan Respýblıkasynyń Prezıdenti Qasym-Jomart Toqaev pen Qazaqstan Respýblıkasy Ulttyq qaýipsizdik komıtetiniń belsendi qoldaýy men yntymaqtastyǵynyń arqasynda múmkin boldy», — dep jazdy Lı Chje Men.
Ol sondaı-aq qazaqstandyq kóshbasshymen jaqyn arada jeke kezdesýge úmit bildirdi. «Biz Qasym-Jomart Toqaev myrzaǵa jáne tıisti taraptarǵa shyn júrekten alǵysymyzdy bildiremiz. Kelesi aıda ótetin Koreıa Respýblıkasy — Ortalyq Azıa samıtinde jeke kezdesip, alǵysymyzdy bildirýge múmkindik bolady dep úmittenemiz. Koreıa Respýblıkasy azamattarynyń qaýipsizdigi men beıbit ómirine qaýip tóndiretin qylmystarǵa eshqandaı jaǵdaıda jol berilmeıdi. Olar qaıda jasyrynsa da, biz olardy sońyna deıin taýyp, jaýapqa tartamyz», — dep atap ótti Ońtústik Koreıa prezıdenti.
Eske salaıyq, 30 shildede QR Ulttyq qaýipsizdik komıteti Ońtústik Koreıanyń 14 azamatynyń ustalǵanyn habarlaǵan bolatyn. Olardyń Otanynda olardy uıymdasqan qylmystyq top quramynda alaıaqtyq jasady dep kúdikteıdi.