Er jigit óner tabar erte qýsa,
Erinip sharshamastaı, belin býsa,
İrtyń-jyrtyń, joq-barǵa kóńil bermeı,
Perishte bop anadan qaıta týsa!
Jaqyn týǵan, baýyr dep aınalmasa,
Qatyn-satyn degenge baılanbasa,
Tynyqpaı, damyl almaı erte de kesh,
İzdense, kidirmese, jaılanbasa.
Dúnıeniń qaıǵysynan zarlanbasa,
Kóz qysyp kúlgenine aldanbasa,
Qaq jarar qara qyldy týra bólip
Aıtylǵan sóz jaıynan jalǵanbasa.
Ósekten at-tonymen alys qashsa,
Estise, uıalǵannan betin bassa,
Jamandyq - aty óshkirge jaqyn júrmeı,
Aıaǵyn kúndik jerden baıqap basa.
Ózinen basqa jandy kem kórmese,
Qutyrtyp, shabystyryp, jel bermese,
Tabylmas aýzyna sý tamyzýshy,
Óziniń tar etigin keń kórmese!
Kózi ashyq adamdarǵa jaqyn júrse,
Olardyń árbir sózin úlgi kórse.
Estigen sóz, kórgendi bos tastamaı,
Qulaq tigip, kóz salyp, jıyp-terse.
Kóńil kózi ashyq jandy dos dep bilse,
Mylqaý, meńireý, nadandy qas dep bilse,
Beınettiń munarlanǵan shól dalasyn
Ujmaqta horlar tikken qos dep bilse.
Bilimsiz qatqan jansyz tas dep bilse,
Óner-bilim - qarny ashqa as dep bilse,
Dúnıeniń teńizinde adasqanǵa
Týra jol kórsetetin bas dep bilse.
Osy oımen týra júrse, bultarmasa,
Basqaǵa moıyn bursa, kóz salmasa -
Óner-bilim jer astynda bolsa-daǵy,
Bir jeter, jalyqtym dep tastamasa.

---