Ońtústik Koreıa soty oıyn ındýstrıasynyń magnaty Kvon Hók Bındi burynǵy áıeline 2,55 trıllıon von (1,87 mlrd dollar) kólemindegi aktıvterdi tóleýge mindettedi. Bul el tarıhyndaǵy eń iri ajyrasý tólemi bolyp otyr. Bul týraly infohub.kz saıty habarlaıdy.
Kvon Hók Bın — Ońtústik Koreıanyń úshinshi iri beıneoıyn kompanıasy Smilegate-tiń negizin qalaýshy. Bloomberg derekteri boıynsha, onyń taza baılyǵy 3 mlrd dollardy quraıdy. Sot sheshimine deıin kompanıa tolyǵymen oǵan tıesili edi. Alaıda sot onyń 35% úlesin, ıaǵnı shamamen 2,5 trıllıon vonǵa baǵalanatyn aksıalardy burynǵy áıeli Lı Hva Djınge berýdi uıǵardy. Sonymen qatar, ol oǵan qosymsha 65 mlrd von qolma-qol aqsha tóleýi tıis.
Bul tólem aldyńǵy rekordtan eki eseden astam joǵary. Buǵan deıin tehnologıalyq alpaýyt SK Group tóraǵasy Chhve Te Von burynǵy áıeline 944 mlrd von tóleýge mindettelgen edi.
Kvonmen ajyrasý týraly aryz bergen Lı Hva Djın Smilegate-tiń 50% úlesin talap etken. Onyń advokattary kompanıa qurylǵan kezde onyń qarjylandyrýǵa kómekteskenin alǵa tartty. Bul týraly Bloomberg habarlaıdy. Kvon men Lı 2001 jyly úılengen, al Kvon Smilegate-ti bir jyldan keıin qurǵan. Kompanıanyń eń tanymal oıyndary — birinshi adam kózqarasyndaǵy shýter CrossFire jáne róldik oıyn Lost Ark.
Lı Hva Djın óziniń 20 jyldan astam ýaqytyn balalardy tárbıeleýge jáne úı sharýasyna arnaǵanyn aıtqan. Al Kvon bolsa, Lı kompanıaǵa ınvestısıa salmaǵanyn jáne onda jumys istemegenin alǵa tartqan. Osy jyldyń basynda Smilegate kompanıanyń barlyq bastapqy kapıtaly Kvonnan kelgenin málimdegen bolatyn.
Smilegate ókili «iri aksıonerdiń jeke isterine túsinikteme berýden bas tartty». The Chosun Daily gazetine silteme jasaǵan málimdemede olar: «Biz ádettegideı óz mindetterimizdi adal atqara beremiz», — degen.
Eki tarap ta sot sheshimine shaǵymdana alady. Osy jyldyń shilde aıynda SK Group tóraǵasy Chhve Te Von burynǵy áıeline 944 mlrd von tóleýge mindettelgen edi. Bul búgingi sheshimge deıin Koreıa tarıhyndaǵy eń iri ajyrasý tólemi bolatyn. Alaıda keıin Joǵarǵy sot jubaılar aktıvteriniń qunyn asyra baǵalaǵan esepteý qateligin atap, bul sheshimdi joıdy. İs qaıta qaraýǵa jiberildi.