Qazaqstanda onkologıalyq kómek azamattarǵa memleket esebinen kórsetiledi. Densaýlyq saqtaý mınıstrliginiń málimetinshe, jyl saıyn 55 myńnan astam adam isikke qarsy dári-dármekti tegin alady, dep habarlaıdy infohub.kz saıty.
Naýqastarǵa 150 ataýdaǵy zamanaýı isikke qarsy preparat qoljetimdi. Onyń ishinde 102 hımıoterapıalyq, 45 targettik jáne úsh ımmýnoonkologıalyq dári bar. Dári-dármekter tegin medısınalyq kómektiń kepildik berilgen kólemi (TMKKK) aıasynda beriledi.
Dári-dármek terapıasynan bólek, elde PET/KT, joǵary tehnologıalyq otalar jáne sáýlelik terapıanyń zamanaýı ádisteri qoljetimdi. Barlyǵy Qazaqstanda 10 ıadrolyq medısına ortalyǵy jumys isteıdi, onda 19 PET/KT apparaty ornatylǵan. Sondaı-aq tórt sıklotrondyq-óndiristik keshen jáne jeti birfotondy emısıalyq kompúterlik tomografıa apparaty jumys isteıdi.
Onkologıalyq ortalyqtarda kúrdeli aǵzany saqtaý jáne rekonstrýktıvtik otalar jasalady, sondaı-aq az ınvazıvti jáne robottyq tehnologıalar qoldanylady. Keıbir jaǵdaılarda úsh ólshemdi modeldeý, jeke súıek ımplanttary jáne neırohırýrgıadaǵy navıgasıalyq júıeler paıdalanylady.
Elde sáýlelik terapıa 40-tan astam apparatta, onyń ishinde 26 syzyqtyq údetkishte júrgiziledi. Jyl saıyn mundaı emdeýdi shamamen 15 myń naýqas alady.
2025 jyly Qazaqstanda Ortalyq Azıadaǵy alǵashqy protondyq terapıa ortalyǵy ashyldy. Onkologıalyq praktıkaǵa adaptıvti, tórt ólshemdi jáne stereotaksıkalyq sáýlelik terapıa, sondaı-aq joǵary dozaly brahıterapıa engizildi.
Onkonaýqastarǵa konsýltasıalar men dıagnostıka «jasyl dáliz» qaǵıdaty boıynsha júrgiziledi — buǵan deıin Kursiv Health onyń qalaı jumys isteıtinin taldaǵan bolatyn.
Eger naýqasqa emdeýge qatysty birdeńe túsiniksiz bolsa, Densaýlyq saqtaý mınıstrligi emdeýshi dárigerge nemese bólim meńgerýshisine júginýge keńes beredi. Sondaı-aq suraqtardy QazOǴZI nemese naýqas emdelip jatqan onkologıalyq ortalyqtyń pasıentterdi qoldaý qyzmetine qoıýǵa bolady.
QazOǴZI saıtynda pasıentterdi qoldaý qyzmetiniń myna nómiri kórsetilgen: 8 (775) 121-45-93. Olar 08:30-dan 17:00-ge deıin jumys isteıdi.
Budan bólek, qarapaıym tilmen jazylǵan tegin halyqaralyq pasıenttik nusqaýlyqtar men jetekshi onkologtardyń NCCN usynymdary da bar.
«Kýrsıv» Qazaqstanda bir jylda 42 myńnan astam jańa qaterli isik jaǵdaıy anyqtalǵanyn jazǵan.