Qazaq onkologıa jáne radıologıa ǵylymı-zertteý ınstıtýtynyń Basy men moıyn isikteri ortalyǵynyń mamandary bes jyl ishinde júzdegen plasıkalyq jáne qalpyna keltirý otalaryn jasap, qazaqstandyqtarǵa 300-den astam daýys protezin ornatty. Bul týraly ONCO FUTURE KAZAKHSTAN 2026 halyqaralyq konferensıasynda Ortalyq jetekshisi, medısına ǵylymdarynyń kandıdaty Murat Qaıbarov aıtty, dep habarlaıdy infohub.kz saıty.
Onyń aıtýynsha, mundaı tásil isikti alyp tastaýǵa ǵana emes, múmkindiginshe ómirlik mańyzdy fýnksıalardy — sóıleý, jutý, tamaq qabyldaý jáne adamnyń syrtqy kelbetin saqtaýǵa nemese qalpyna keltirýge múmkindik beredi.
2021–2025 jyldary barlyǵy 4 880 naýqas em qabyldady. Onyń ishinde 272 ota plasıkalyq jáne qalpyna keltirý arqyly jasaldy, al 300-den astam daýys protezi naýqastarǵa ornatyldy.
«Bizdiń mindetimiz — isikti alyp tastaý jáne adamnyń kúndelikti ómirine táýeldi fýnksıalardy barynsha saqtaý. Mundaı tásil sóıleýdi, jutýdy, tamaq qabyldaý múmkindigin, sondaı-aq naýqastyń syrtqy kelbetin saqtaýǵa jáne qalpyna keltirýge baǵyttalǵan», — dedi Murat Qaıbarov.
Buǵan deıin «Kýrsıv» sońǵy segiz jylda Almatyda onkologıalyq aýrýlarmen aýyratyn naýqastardyń bes jyldyq ómir súrý deńgeıi 46%-dan 75%-ǵa óskenin jazǵan. Em nátıjeleriniń jaqsarýyna yqpal etetin faktorlardyń biri retinde mamandar zamanaýı medısınalyq tehnologıalardyń engizilýin ataıdy. Atap aıtqanda, qalalyq onkologıalyq ortalyqta robottandyrylǵan hırýrgıalyq júıe paıda boldy.
Onkologtardyń aıtýynsha, robottandyrylǵan jabdyqtyń joǵary dáldigi iri qan tamyrlarynyń zaqymdalý yqtımaldyǵyn azaıtyp, sonyń saldarynan naýqastardyń qan quıýǵa degen qajettiligin tómendetedi. Sonymen qatar, júıeni paıdalaný otadan keıingi asqynýlar, qabynýlar men ınfeksıalar qaýpin azaıtýǵa kómektesedi.