2026 jyldyń birinshi jartyjyldyǵynda Qazaqstanda tegin onkoskrınıngten 2,3 mln-nan astam adam ótti. Bul 1 837 qaterli isik jaǵdaıyn anyqtaýǵa múmkindik berdi, olardyń kópshiligi erte satyda, dep habarlaıdy infohub.kz.
Densaýlyq saqtaý mınıstrligi elde úsh túrli onkoskrınıng tegin júrgiziletinin eske saldy: sút bezi qaterli isigin, jatyr moıny qaterli isigin jáne kolorektaldy qaterli isikti erte anyqtaý.
Osy jyldyń alty aıynda onkologıalyq tekserýden 2 362 568 adam ótti. Skrınıng nátıjeleri boıynsha: sút bezi qaterli isiginiń 1 238 jaǵdaıy, kolorektaldy qaterli isiktiń 372 jaǵdaıy jáne jatyr moıny qaterli isiginiń 227 jaǵdaıy rastaldy.
«2021–2025 jyldary Qazaqstanda III–IV satyda anyqtalǵan onkologıalyq aýrýlardyń úlesi 34,9%-dan 32%-ǵa deıin tómendedi. Sońǵy bes jylda elde onkoskrınıngten 14 mln-nan astam adam ótti, al jyl saıynǵy halyqty qamtý 13,5%-ǵa ósti», — delingen habarlamada.
Dárigerler basty ereje — profılaktıkalyq tekserýlerdi keıinge qaldyrmaý jáne skrınıngten ýaqytyly ótý, qaterli isikti erte satyda anyqtaý kerektigin atap ótti.
Buǵan deıin Almatyda bıylǵy alty aıdyń qorytyndysy boıynsha profılaktıkalyq tekserýlerdiń nátıjeleri shyǵarylǵany habarlanǵan bolatyn: qala turǵyndarynan 250-den astam qaterli isik jaǵdaıy anyqtaldy. Sondaı-aq teri, súıek jáne jumsaq tinder sarkomasyn erte anyqtaýǵa arnalǵan ashyq esik kúninde 569 adam tegin tekserýden ótti, onyń segizinde qaterli isikke kúdik týǵyzatyn isikter, al taǵy 28-inde isik aldy jaǵdaılar anyqtaldy.