Ońtústik Koreıa prezıdenti Lı Chje Men Ýkraına prezıdenti Vladımır Zelenskıdi eki soltústikkoreıalyq tutqyndy tapsyrý týraly aqparatty jarıa etkeni úshin qatygezdik pen jaýapsyzdyqta aıyptady, dep habarlaıdy infohub.kz saıty.
Yonhap agenttiginiń málimetinshe, synǵa Nú-Iorktegi BUU Bas Assambleıasynda sóılegen Vladımır Zelenskıdiń sózi sebep bolǵan. Onda ol Ýkraına jaqynda eki soltústikkoreıalyq sarbazdy Ońtústik Koreıaǵa jibergenin aıtqan. Ýkraına prezıdentiniń ákimshiligi eki soltústikkoreıalyq tutqyndy tapsyrý Seýlmen tikeleı dıalog aıasynda júzege asqanyn rastady.
Lı Chje Men bul máseleniń asa názik ekenin jáne dıplomatıaǵa, ulttyq qaýipsizdikke, sondaı-aq Koreı túbegindegi qaýipsizdik jaǵdaıyna orasan zor áser etýi múmkin ekenin atap ótti.
«Ýkraına aqparatty jarıalamaý týraly kelisimdi buzyp, málimetti jarıa etti. Aqparattyń jarıa etilý sebepterin bilmeımin, biraq buǵan ókinemin», — dedi Ońtústik Koreıa prezıdenti.
Onyń aıtýynsha, Seýl men Kıev soltústikkoreıalyq sarbazdardy qupıa túrde tapsyrýǵa kelisken. Sebebi aqparat jarıa bolǵan jaǵdaıda kóptegen qıyndyq týyndaýy múmkin edi.
Sonymen qatar Ońtústik Koreıanyń opozısıalyq partıalary bul kelisimdi qupıa ustaý sheshimin synady. Lı Chje Men óz kezeginde osyndaı názik kelisimniń egjeı-tegjeıin jarıa etý qatygezdik pen jaýapsyzdyq bolar edi dep jaýap berdi.
Eske salaıyq, 2025 jyldyń qańtarynda eki soltústikkoreıalyq sarbaz Reseıdiń Kýrsk oblysynda ýkraın kúshteriniń qolyna túskeni belgili bolǵan.