Zeınetker jastaǵy qazaqstandyqtar nesıeni qashyqtan rásimdeı almaıdy. Jańa erejeler 21 jasqa tolmaǵan azamattarǵa da qatysty, dep habarlaıdy infohub.kz saıty.
Ulttyq Bank tóraǵasy Tımýr Súleımenovtiń aıtýynsha, endi nesıe alý úshin egde jastaǵy qaryz alýshylar bank bólimshesine jeke baryp, qujat tapsyrýy kerek. Bul shara telefon jáne ınternet alaıaqtaryna qarsy kúresýge baǵyttalǵan. Olar adamdarǵa qysym kórsetip, nesıe rásimdetýge májbúrleıdi.
Bank qyzmetkerleri jaǵdaıdy muqıat baǵalaýǵa mindetti. Eger adam úshinshi tulǵalardyń nusqaýymen áreket etip jatsa, psıhologıalyq qysymda bolsa nemese nesıeniń maqsatyn túsindire almasa, qarjy uıymy nesıe berýden bas tartýy tıis.
"Bank nesıe bermeýge mindetti, bul 'bere alady' nemese 'bere almaıdy' degen másele emes", — dep atap ótti Tımýr Súleımenov.