Qazaqstannyń ońtústigindegi aýyl turǵyny halyqqa qyzmet kórsetý ortalyǵynyń (HQKO) basshysy óz úıiniń janynda atys jasady dep málimdedi. Bul jóninde Jambyl oblysy polısıa departamentinde túsinikteme berdi, dep habarlaıdy infohub.kz saıty.
Qazaqstandyq zańger Ǵabıt Ómirbekov Instagram-daǵy jeke paraqshasynda Jambyl oblysy polısıa departamentiniń bastyǵy Qaısar Sultanbaevqa júgindi. Zańgerdiń sózderin «QazAqparat» habarlaıdy.
Ǵabıt Ómirbekovtiń aıtýynsha, oqıǵaǵa qaryz týraly áńgime sebep bolǵan — kúndiz Turar Rysqulov aýdanyndaǵy Qyzylsharýa aýylynyń turǵyny Aset esimdi azamat jergilikti HQKO basshysymen kezdesip, aqshasyn qaıtarýdy suraǵan.
«Túnde, ótinish avtorynyń aıtýynsha, basshy aýyl turǵynynyń úıine kelip, myltyqtan atys jasaǵan. Ómirbekov er adam mas kúıde bolýy múmkin dep boljaıdy. Zańger sondaı-aq onyń qyzmettik kólikpen júrgenin kórsetetin beınebaqylaý kameralarynyń jazbalaryna silteme jasaıdy. Onyń aıtýynsha, oqıǵadan keıin Aset úıden shyǵýǵa qorqady», — delingen jarıalanymda.
NUR.KZ tilshisi Jambyl oblysy polısıa departamentiniń baspasóz qyzmetine saýal joldady.
«Osy fakti boıynsha polısıa qyzmetkerleri túngi tynyshtyqty buzyp, qarýǵa uqsaıtyn zattan atys jasaǵan 56 jastaǵy er adamdy anyqtady. Quqyq buzýshy QR ÁQBtK-niń 485-babynyń 1-bóligi boıynsha ákimshilik jaýapkershilikke tartyldy. Onyń atyna tirkelgen 12-kalıbrli «TOZ-34R» markaly ańshy myltyǵy tárkilendi. Sonymen qatar er adammen quqyq buzýshylyqtyń aldyn alý jáne zańnama talaptaryn saqtaý boıynsha profılaktıkalyq túsindirý jumystary júrgizildi», — dep túsinikteme berdi polısıada.