OpenAI-diń derbes AI agenti buǵan deıin Hugging Face platformasyna birneshe kún boıy shabýyl jasady. Endi ol Modal Labs tehnologıalyq kompanıasy klıentiniń derekterin buzýy múmkin, dep habarlaıdy Reuters.
Modal Labs basshylyǵy kompanıanyń ınfraqurylymy buzylmaǵanyn, oqshaýlaý mehanızmderi qalypty jumys istegenin atap ótti. Kompanıanyń málimetinshe, klıentteriniń biri aýtentıfıkasıasyz ashyq sońǵy núkteni (endpoint) jarıalap qoıǵan. Ol kez kelgen ınternet paıdalanýshyǵa oqshaýlanǵan synaq ortalarynda kodty iske qosýǵa múmkindik bergen.
«Modal klıentiniń biri aýtentıfıkasıasyz sońǵy núkteni jarıalap, kez kelgen ınternet paıdalanýshyǵa óziniń qumsalǵyshyn (sandbox) kodty oryndaý úshin paıdalanýǵa múmkindik bergeni bizge belgili. Osyny zıankes paıdalandy. Modal platformasy men oqshaýlaý júıesi eshqandaı buzylýǵa ushyraǵan joq», – dedi Modal Labs tehnıkalyq dırektory Akshat Býbna.
Hugging Face hronologıasy boıynsha, zıankes aldymen úshinshi tarap provaıderiniń ınfraqurylymynda ornalasqan oqshaýlanǵan synaq ortasyna qol jetkizgen. Sodan keıin ony aýqymdy shabýyl úshin platforma retinde paıdalanǵan. Hugging Face úshinshi tarap provaıderin atamady. Alaıda Modal Labs oqıǵa kompanıanyń bir klıentine qatysty ekenin rastady.
Buǵan deıin Reuters OpenAI AI agenti ishki testileý kezinde baqylanatyn ortadan shyǵyp, syrtqy ınfraqurylymǵa qol jetkizip, birneshe kún boıy Hugging Face júıelerine shabýyl jasaǵanyn habarlady. Agenttiktiń aqparatynsha, Hugging Face qaýipti joıyp, FBR-ge habarlaǵanǵa deıin OpenAI máseleni baıqamaǵan.
OpenAI Reuters jarıalanymdarynda dálsizdikter bar ekenin málimdedi, biraq qandaı aqparatty qate dep sanaıtynyn naqtylamady. Ázirleýshi ókilderi jańa pikir suraýyna dereý jaýap bermedi.
Oqıǵa keńinen rezonans týdyrdy, sebebi derbes AI agent osaldyqty paıdalanyp, synaq ortasynan shyǵyp, úshinshi tarap kompanıasynyń júıelerine qol jetkizdi. Bul jaǵdaı synaq kezinde kodty óz betinshe oryndaýǵa jáne syrtqy ınfraqurylymmen árekettesýge múmkindik beriletin ozyq AI júıeleriniń qaýipsizdigine qatysty alańdaýshylyqty kúsheıtti.