Oralda erekshe iri mólsherdegi alaıaqtyq týraly qylmystyq is boıynsha úkim jarıalandy: kásiporyn shotynan 2,2 mln AQSh dollaryn jymqyrýdy uıymdastyrǵan sottalýshy 10 jylǵa bas bostandyǵynan aıyryldy, dep habarlaıdy infohub.kz saıty.
Batys Qazaqstan oblystyq sotynyń baspasóz qyzmeti málim etkendeı, Oral qalalyq soty Qazaqstan Respýblıkasy Qylmystyq kodeksiniń 190-baby 4-bóliginiń 2-tarmaǵy boıynsha aıyptalǵan adamǵa qatysty isti qarady — erekshe iri mólsherdegi alaıaqtyq.
Sot anyqtaǵandaı, sottalýshy Aqsaı qalasynda jaýapkershiligi shekteýli seriktestik tirkep, onda jalǵyz quryltaıshy ári basshy bolǵan. Keıin ol jarǵylyq kapıtaldaǵy úlesterdi qyzmetkerler arasynda qaıta bólgen, alaıda is júzinde seriktestik qyzmetin baqylaýdy jalǵastyryp, bıznes-menedjer laýazymyn atqarǵan.
AQSh aýmaǵynda júrip, sottalýshy kásiporynnyń aqshalaı qarajatyn jymqyrýdyń qylmystyq josparyn ázirlegen. Seriktestiktiń jańa dırektoryn adastyryp, oǵan basqa seriktestikpen kelisimshartty uzartý úshin jabdyq satyp alý qajettigi týraly kórineý jalǵan málimetter aıtqan.
Qazaqstan Respýblıkasynyń valútalyq baqylaý talaptaryn aınalyp ótý úshin sottalýshy basshyny mámilelerdi paıyzsyz qaryz túrinde rásimdeýge kóndirgen.
Nátıjesinde seriktestik shotynan sottalýshy baqylaıtyn amerıkandyq kompanıanyń shotyna birneshe transhpen jalpy somasy 2,2 mln AQSh dollary, ıaǵnı 948 mln 337 myń teńgege balamaly qarajat aýdarylǵan.
Sot er adamdy Qazaqstan Respýblıkasy Qylmystyq kodeksiniń 190-baby 4-bóliginiń 2-tarmaǵynda kózdelgen erekshe iri mólsherdegi alaıaqtyq jasaǵany úshin kináli dep tanyp, oǵan 8 jylǵa bas bostandyǵynan aıyrý jazasyn taǵaıyndady.
Qazaqstan Respýblıkasy Qylmystyq kodeksiniń 58-babynyń 5 jáne 6-bólikterine sáıkes, neǵurlym jeńil jazany neǵurlym aýyr jazamen sińirý jolymen, Atyraý qalasynyń №2 sotynyń 2025 jylǵy 24 shildedegi úkimimen taǵaıyndalǵan jazany qosa eseptegende, sottalýshyǵa túpkilikti 10 jylǵa bas bostandyǵynan aıyrý jazasy taǵaıyndalyp, ortasha qaýipsizdiktegi qylmystyq-atqarý júıesi mekemesinde óteý belgilendi.
Sonymen qatar ol komersıalyq kásiporyndarda basshylyq laýazymdardy atqarý quqyǵynan 3 jylǵa aıyrylyp, qylmystyq jolmen tabylǵan múlik tárkilendi.
Jábirlenýshi taraptyń azamattyq talap-aryzy tolyq kólemde qanaǵattandyryldy. Sottalǵan adamnan seriktestik paıdasyna 2,2 mln AQSh dollary (948 mln 337 myń teńge) mólsherindegi múliktik zalal, sondaı-aq memlekettik baj óndirildi.
Azamattyq talap-aryzdy qamtamasyz etý maqsatynda sottalǵan adamnyń jáne oǵan baqylaýdaǵy sheteldik kompanıanyń banktik shottaryna salynǵan tyıym saqtaldy.
Úkim zańdy kúshine engen joq jáne apelásıalyq tártippen shaǵymdanýǵa bolady.