Oralda kólik júrgizý quqyǵynan aıyrylǵan er adam ózine qate jazylǵan aıyppuldardy sot arqyly joıdyrdy. Bul týraly infohub.kz habarlaıdy.
Batys Qazaqstan oblystyq sotynyń baspasóz qyzmetiniń málimetinshe, ákimshilik quqyq buzýshylyqtar jónindegi mamandandyrylǵan sotqa er adamnan QR ÁQBtK-niń 592-baby 1-bóligi jáne 230-baby 2-bóligi boıynsha jazylǵan aıyppuldarǵa shaǵym túsken. Ol 2025 jyldan beri kólik júrgizý quqyǵynan aıyrylǵanyn, aıyppuldar kórsetilgen avtokólikti qujatsyz satyp jibergenin aıtqan.
Sot óz bastamasymen polısıa departamentinen osy kóliktiń Oraldaǵy qozǵalysyna qatysty qosymsha beıne jáne fotosýretterdi suratyp aldy. Tergeý barysynda sol kezde kólikti basqa bireýdiń júrgizgeni anyqtaldy.
Polısıa departamentine naqty quqyq buzýshyny anyqtaýǵa ýaqyt berilip, bul merziminde oryndaldy. Sottyń aralasýymen aıyppuldardy tóleý talaptary kólikti naqty basqarǵan júrgizýshige qaıta rásimdeldi. Shaǵym berýshi 64 875 teńgeden bosatyldy.