Búgin Oral qalasynyń turǵyndary qaladaǵy qatty tútinge shaǵymdandy. Sebebi – áıgili Han toǵaıynda bolǵan iri órt, dep habarlaıdy infohub.kz.
«Moı gorod» basylymynyń Instagram-paraqshasynda tútin men kúldiń ushyp júrgeni turǵyndardy úrkitken vıdeo jarıalandy. Kýágerlerdiń aıtýynsha, kúl aınalaǵa tarap, tútinnen tynys alý qıyndaǵan. «Terezeden qarasam, aldymen bult dep oıladym, keıin tútin ıisin sezip, balkonda kúlniń qonǵanyn kórdim. Búgin ystyq ári jeldi bolǵandyqtan, bul óte qorqynyshty», – dedi Oral turǵyny Alına.
Keshke Batys Qazaqstan oblysynyń ákimdigi jaǵdaıdy túsindirdi. Olardyń málimetinshe, órt Oral orman sharýashylyǵy aýmaǵyndaǵy Han toǵaıy orman-saıabaq aımaǵynda bolǵan. Órt aýdany – 18 gektar. Bul aımaqta negizinen úıeńki men shaǵan ósedi. Órtti sóndirýge tikushaq qosa kóptegen tehnıka, sondaı-aq TJM jáne orman sharýashylyǵy qyzmetkerleri jumyldyryldy. Saǵat 20:28-de órt oqshaýlandy.
«Aýa temperatýrasynyń joǵary bolýyna jáne qatty jelge qaramastan, biregeı tabıǵı-tarıhı nysan aýmaǵynda órttiń ári qaraı taralýyn boldyrmaý múmkin boldy. Qazirgi ýaqytta oqıǵa ornynda jumystar jalǵasýda», – dep qosty ákimdik ókilderi.