Oralda apelásıalyq satydaǵy sot talapkerdiń orys tilin bilmeıtini týraly jalǵan málimdemeden keıin is júrgizý quqyqtaryn teris paıdalanǵany úshin aqshalaı óndirip alý sharasyn qoldandy, dep habarlaıdy infohub.kz saıty.
Batys Qazaqstan oblystyq sotynyń baspasóz qyzmetiniń habarlaýynsha, ákimshilik ister jónindegi sot alqasy isti qaraý barysynda talapkerdiń ókiline is júrgizý quqyqtaryn teris paıdalanǵany úshin QR Ákimshilik rásimdik-prosestik kodeksiniń 127-babynda kózdelgen is júrgizý májbúrleý sharasy – aqshalaı óndirip alýdy qoldandy.
Sot otyrysynda talapkerdiń joqtyǵynyń sebebin anyqtaý kezinde onyń ókili senim bildirýshiniń sot isin júrgizý tili – orys tilin meńgermegendikten isti qaraýǵa qatyspaıtynyn málimdedi. Sonymen qatar ákimshilik talap qoıý tek daýlanyp otyrǵan ákimshilik akt orys tilinde shyǵarylǵandyqtan, sol tilde jazylǵany kórsetildi. Bul málimetterdiń mańyzy zor boldy, sebebi olar birinshi satydaǵy sottyń sot isin júrgizý tili týraly zań talaptaryn buzǵanyn jáne qabyldanǵan sot aktisiniń zańdylyǵyna áser etýi múmkin edi.
Talapker ókiliniń dálelderin tekserý nátıjesinde birinshi satydaǵy sotta talapkerdiń tóraǵalyq etýshi sýdıanyń suraqtaryn erkin túsinip, orys tilinde jaýap bergeni, qarym-qatynasta qınalmaǵany jáne sot isin júrgizý tilin aýystyrý ne aýdarmashy shaqyrý týraly ótinishhat bermegeni anyqtaldy.
Sot alqasy otyrysty jalǵastyryp, beınekonferensbaılanys arqyly talapkerdi qosty. Otyrys barysynda ol da orys tilinde erkin sóılep, aýdarmashysyz sottyń suraqtaryna jaýap berdi.
Sot alqasy talapker ókiliniń sotqa jalǵan málimet bergeni, sonyń saldarynan sot apelásıalyq shaǵymnyń dálelderin qaraýǵa qatysy joq qosymsha is júrgizý áreketterin jasaýǵa májbúr bolyp, sot talqylaýynyń sozylýyna ákep soqtyrǵany degen qorytyndyǵa keldi.
ÁRPK-niń 28-baby 2-bóligine sáıkes, ákimshilik proseste talapker sotqa istiń naqty mán-jaılaryn habarlaýǵa jáne tolyq shynaıy aıtýǵa mindetti. Bul mindet talapkerdiń ókiline de qatysty, ol ózine berilgen is júrgizý quqyqtaryn adal paıdalanýǵa tıis.
Anyqtalǵan mán-jaılardy eskere otyryp, sot alqasy ókildiń is-áreketin is júrgizý quqyqtaryn teris paıdalaný dep tanyp, 10 AEK (43 250 teńge) mólsherinde aqshalaı óndirip alý sharasyn qoldandy.
«Aqshalaı óndirip alýdy qoldaný proseske qatysýshylardyń adal minez-qulqyn qamtamasyz etýge, is júrgizý quqyqtaryn teris paıdalanýdyń aldyn alýǵa, sot isin júrgizýdiń oryndy merzimderin saqtaýǵa jáne sot pen zańǵa qurmetti kózqarasty nyǵaıtýǵa baǵyttalǵan», — dep atap ótti Batys Qazaqstan oblystyq sotynyń baspasóz qyzmeti.
Sottyń qaýlysy zańdy kúshine endi.