Батыс Қазақстан облысының мамандандырылған ауданаралық әкімшілік соты кепілге қойылған көлікті электрондық аукционда нарық құнынан шамамен екі есе арзан сатудың заңдылығы туралы істі қарады, деп хабарлайды infohub.kz сайты.
Батыс Қазақстан облыстық сотының баспасөз қызметі мәлім еткендей, сотқа 2012 жылы шығарылған Range Rover Sport көлігін сату кезінде жеке сот орындаушысының әрекеттеріне дау айтқан әйел талап қойған.
Талапкердің айтуынша, банкте кепілде тұрған көлік кепілге қойылған мүлікке өндіріп алу туралы заңда көзделген сот актісінсіз сатылған. Сонымен қатар борышкерлердің кепілге салынбаған өзге де мүлкі болған.
Сот көліктің электрондық аукционда 6 680 850 теңгеге, ал нарықтық құны 12 147 000 теңге екенін анықтады. Оған қоса жеке сот орындаушысы кепілге қойылған мүлікке өндіріп алудың заңда белгіленген тәртібін сақтамаған.
Істі қарау қорытындысы бойынша сот 2025 жылғы 1 қазандағы көлікке өндіріп алу туралы қаулыны, 2025 жылғы 15 желтоқсандағы оны сатуға беру туралы қаулыны және 2026 жылғы 15 қаңтардағы электрондық аукцион қорытындылары туралы хаттаманы заңсыз деп танып, күшін жойды.
«Сот шешімі атқарушылық іс жүргізудің заңдылығын қамтамасыз етуге және кепілге салынған мүлікке өндіріп алу кезінде құқықтық қатынасқа қатысушылардың құқықтарын қорғауға бағытталған», — деп атап өтті сотта.